Хуссар Ирыстоны сарæзтой республикæйы адæмон артисткæ Галуанты Людмилæйы сфæлдыстадон изæр. Бынæттон Драмон театры уыцы цауы тыххæй адæмæй къух бакæнæн нал уыдис. Галуанты Людмилæ ирон аивад æмæ сфæлдыстадæн цы стыр хæрзты бацыд, уыдон ранымайынæн рæстæг бирæ бахъæудзæн. Иу хатт ма сæ `рхъуыды кодтой, изæрмæ чи `рбацыд, уыдон. Изæрмæ сæмбæлдысты, Галуанты Людмилæйы куыстæн стыр аргъ чи кæны, йæ курдиатæй бирæ азты кæй зæрдæтæ рухс кодта, уыдон. Уазджытæ сæмбæлдысты Цæгат Ирыстонæй дæр.
Галуанты Людмилæйы сфæлдыстадон изæр бацæттæ кæныны хæс сæхимæ райстой Хуссар Ирыстоны Драмон театры артисттæ. Йæ райдианæй дæр бæрæг дардта, аивады кусæджы зæрдæйы цы хъарм æнкъарæнтæ цардис, уыдон адæмыл кæй уæрста. Егъау экраныл адæмæн равдыстой, Галуанты Людмилæ цы спектакльты хъазыд, уыдонæй скъуыддзæгтæ.
Артисттæ бакастысты Галуанты Людмилæйы æмдзæвгæтæ, акодтой йын йæ ныхæстыл фыст зарджытæ. Бузныджы ныхæстæ уыцы изæр стыр курдиаты хицау бирæ фехъуыста.
Галуанты Людмилæмæ цард йæ мидбылты нæ худт. Фæлæ йын цыфæнды зын куы уыдаид, уæддæр-иу йæ мидхъуырдухæнтæ кулисæты фæстæ фæуагъта, цæмæй адæмы размæ рахæсса сыгъдæг æмæ зæрдиаг курдиат. Ахæм æрдзон тыхы хицау разынд, æмæ уыцы иухуызон дæсныйæ æххæст кодта куыд комедион, афтæ трагикон фæлгонцтæ дæр. Зæгъæм, “Ныййарæджы кадæджы” Цæгаты тæмæн калдта Беккуызарты Уарзетæ, Хуссары та уыцы æвæджиауы роль бабар кодтой Галуанты Людмилæйæн. Уымæн æмæ зыдтой, ахъаздзæн æй зæрдæйæ. Хъуыды дæр æй уымæн бакодтой. Уымæн æм æрцыдысты Цæгатæй дæр сфæлдыстадон къордтæ, йæ хæлæрттæ æмæ зындгонд артисттæ. Канд арфæйы ныхæстæ сæ нæ фехъуыста, уыдон дæр ын акодтой йе `мдзæвгæтыл фыст зарджытæ, ацагътой алæмы уарзон мелодитæ.
Адæмон артисткæйæн арфæ ракодта Хуссар Ирыстоны президент Бибылты Анатолий дæр. Куыд загъта, афтæмæй сæрбæрзонд у, ахæм номдзыд артисткæимæ иу дуджы цæрынæй.
Бибылты Анатолий ма Галуанты Людмилæйы сфæлдыстадон изæры фæлгæты кады нысæнттæй схæрзæхджын кодта Гæздæнты Булат æмæ Къуымæриттаты Тенгизы. Изæры кæронбæттæны та артисттæ иууылдæр иумæ ракъахдзæф кодтой сценæмæ æмæ акодтой, кæддæр Сагкаты Валерий кæй зарыд, Хуссар Ирыстоны уыцы æнæофициалон гимн “Мæ Ирыстон”, зæгъгæ. Йæ ныхæсты автор у Галуанты Людмилæ.
Хъулаты Юрий
