Гуссойты хæдзары æнкъард æмæ сабыр никуы вæййы. Бинонтæ хъомыл кæнынц 12 сывæллоны, уыдонæй 8 сты лæппутæ, 4 та чызджытæ. Сæ ныййарджытæ Гочæ æмæ Ингæ базонгæ сты 20 азы размæ. Куыд радзырдтой, афтæмæй кæрæдзийы уайтагъд бамбæрстой, бафæндыд сæ се ‘мкъайад бафидар кæнын. Уæдæй иумæ сты сæ зын сахаты æмæ хъæлдзæг бонты дæр, хизынц зындзинæдты сæрты, ныртæккæ æнхъæлмæ кæсынц æртындæсæм сывæллонмæ.
20 азмæ Гочæ æмæ Ингæйы ‘хсæн хъæр ныхас никуы рауад. Уый та уымæн, æмæ кæддæриддæр архайынц алы фарстайыл дæр иумæйагæй сабырæй дзурын, кæрæдзийы æмбарынц, аргъ кæнынц. Сæ кæстæрты аккаг хъомылад æмæ алывæрсыг райрæзт та нымайынц сæйрагдæрыл. Сæ цоты сабийæ фæстæмæ ахуыр кæнынц кæрæдзийæн æххуыс кæныныл. Æрæджы æртæ хистæр сывæллоны сæхæдæг сцалцæг кодтой хæдзары агъуыстытæ.
Бинонты къæбицæн дзуапдæттæг у Илья. Лæппу ахуыр кæны хæринаггæнæгыл, æрвылбон хæдзаронты сбуц кæны алыхуызон хæрзад хæринæгтæй.
Бинонтæ, уарзондзинад æмæ иузæрдиондзинад боны агъоммæ Гуссойты бинонтæн раарфæ кодтой Адæмон фронт æмæ бирæсывæллонджын бинонты иугонды активисттæ. Сывæллæттæн балæвар кодтой конструктортæ, хъазæнтæ, уæлæдарæс. Уымæй уæлдай ма, техникæйы дуканимæ сертификаттæ. Ахæм æхсызгон æргомздæхт æнхъæлмæ каст Дудайты Бинонтæм дæр.
Марат æмæ Ларисæ базонгæ сты 2022-æм азы кæрон. Уæд Марат ссыд сæрмагонд æфсæддон операцийы бынатæй отпускы. 4 мæйы фæстæ сфæнд кодтой се ‘мкъайад сфидар кæнын. 2023-æм азы æфсæддон уæззау цæф фæцис, нæлгоймаджы къах бахъуыд лыг кæнын. Фæлæ уыцы зындзинæдты сырты бинонты иумæ хызтысты.
Æрвылаз бинонты æппæтуæрæсеон бæрæгбоны фæдыл адæмон фронт æмæ бирæсывæллонджын бинонты иугонд бабæрæг кæнынц алы категориты бинонты. Бацæттæ сын кæнынц къахдарæс, уæлæдарæс, хъазæнтæ – иуныхасæй сывæллæттæ цæуыл бацин кæдзысты, уыдон. Самал сæ кæнынц æмсæрдар Дзгойты Дмитрийы æххуысæй.
Абон раарфæ кодтой 10 бинонтæн. Се ‘хсæн бирæсывæллонджын, æххуысцух æмæ сæрмагонд æфсæддон операцийы архайджыты бинонтæ. Ахæм æрхъуыды у куыстуатты сæйраг нысан.
