Цæгат Ирыстоны дарддæр архайынц фыццаг медицинон æххуысы уавæртæ фæхуыздæр кæныныл. Дæрддзæф хъæуты аразынц ног фелсырон-акушерон пункттæ æмæ амбулаторитæ. Ног объекттæ хъæугæ домæнтæн дзуапп дæттынц æви нæ? Адæмон фронты уæнгтæ сын сæ хъæрхъæддзинад бæрæг кæнынц æппынæдзух. Ныр дæр бабæрæг кодтой Хъæрмæдон, Донгæрон æмæ Комгæроны фелсырон-акушерон пункттæ. Лæмбынæг æркасты фæстæ рабæрæг кодтой аиппытæ. Цавæртæ, уый базыдтой ме ‘мкусджытæ.
Хъæрмæдоны фелсырон-акушерон пункт сарæзтой фарон. Кусын та райдыдтой 3 мæйы размæ. Бирæ рæстæг дзы нæдæр дон уыди, нæдæр хъармгæнæн системæ. Ныр куыстытæ æххæстгæнæг аиуварс кодта æппæт аиппытæ дӕр. Фелсырон пункт кусы æрвылбон. Пухаты Евгения у пенсиисæг. Æрæджы коронавирусæй сдзæбæх. Куыд зæгъы, афтæмæй йын йе ‘нæниздзинадмæ дохтыртæ лӕмбынӕг кӕсынц. Раздæр-иу медицинон æххуысы фæдыл хъæуы цæрджыты бахъуыд 20 километры дарддæр цæуын, тагъд æххуысы хæдтулгæмæ та æнхъæлмæ кастысты сахатæй фылдæр.
Фелсырон-акушерон пункты рацарæзтмæ æнхъæлмæ кæсынц Донгæроны цæрджытæ дæр. Фæлæ бæстыхай кæд амад фæци, уæддæр дзы мидæгӕй кусинӕгтӕ нырма бирæ ис. Хъармгæнæн хæтæлтæ кæй нæ кусынц, уый аххосæй агъуыстыты къултæ схъуына сты. Адæмон фронты эксперттæ æппæт хъæндзинæдтæ дæр фæнысан кодтой.
Дарддæр Адæмон фронты уæнгтæ бабӕрæг кодтой Комгæроны амбулатори. Кусы ныр 3 къуырийы дæргъы. Афтæмæй объект сарæзтой фарон фæззæджы. Раздæр амбулатори уыд бынæттон администрацийы бæстыхæйттæй иуы. Ӕййӕфтой зындзинæдтæ. Уымӕ гӕсгӕ фелсырон-акушерон пункты дохтыртæн ныр уæлдай æхсызгон у.
Дæрддзæф хъæуты фелсырон-акушерон пункттæ байгом кодтой федералон программæ «Модернизация первичного звена здравоохранения»-йы фæрцы. Æдæппæтæй сӕ 2 азмӕ сарæзтой 38 хъæуы.
