Тæгæргоймаг кафт чи сæвæрдта, ахæм коллективтæ бирæ не сты. Уæвгæ, уый ансамбль “Хохагæн” у йæ хицæндзинад. Сæ концертон программæтæ та ис афтæ зæгъæн, æмæ сты нæ историмæ балц. Симд, хонгæ, чызджыты кафт, хохаг, туаллаг кæфтытæ. Се ‘ппæт дæр сты сæхи, оригиналон æвæрд.
Генералон репетицийы сты ансамблы сæйраг къорд. “Хохаг”-мæ бахауын æнцон нæу. Уымæ бæллы, æвæццæгæн æмæ, хæххон аграрон университеты алы студент дæр. Ам чи кафы, уыдон хорз æбарынц сы бæрн сыл ис, уый æмæ архайынц ансамблы кад ноджы бæрзонддæр сисыныл. Не ‘вгъау кæнынц сæ курдиат æмæ арæхстдзинад.
Ансамблæн бындур сæвæрдтой 1963 азы, институты уæды ректор Джанайты Георгийы хъæппæрисæй. 60 азмæ “Хохаг” гастрольтимæ æрзылд æппæт дунейыл. Франци, Англи, Швейцари, Куба, Инди, Голланди, Польшæ, Бельги, Вьетнам. Бантыст сын цæдисон, æппæтуæрæсеон æмæ æппæтдунеон фестивальты уæлахиздзаутæ суæвын.
Уæд 2006-æм азы коллектив райста иннæтæй ахсджиагдæр æмæ зынаргъдæр хæрзиуæг — радтой сын æппæты зæрдæмæдзæугæ коллективы ном, зæгъы ансамблы аивадон разамонæг, Цæгат Ирыстоны адæмон артист Æлборты Юрий. Йе руаджы “Хохаг”-æн бантыст ахæм бæрзонд æмвæзадмæ схизын. Йæ разамындимæ раивтой 18 фæлтæры, фæлæ æнæивгæ у иу хъуыддаг: йæ куыст æмæ аивадуарзджытæм уарзондзинад æмæ иузæрдиондзинад. Æлборты Юрий сæрыстырæй дзуры, 2018-æм азы Ватиканы, сыгъдæг Петры фæзы ансамбль симд куы кафыд, уæд сæ дысныдзинадæй балхæдтой европæйаг публикæйы зæрдæтæ. Фестивалы разамонæг Тамассо Дучийы курдиатмæ гæсгæ, “Хохаг” æртæ хатты сфæлхат кодта кафты зылд.
Уæвгæ, ам æрмæст кафыныл нæ ахуыр кæнынц, фæлæ ирон æгъдæуттыл дæр. Уæлдай æргом здахынц уæлæдарæс æмæ музыкæмæ, уыдон алайнаг дугæй исынц сæ райдиан.
Ансамблимæ куыстой зындгонд кафджытæ Уарзиаты Хадзысмел, Козаты Станислав, Цхуырбаты Вадим, Саулохты Мелс, Хуыбаты Омар.
60 азы сценæйыл. Уыцы æмгъуыдмæ ансамбль схъомыл кодта университеты къорд фæлтæры. Коллектив та нæ республикæйы ном айхъусын кодтой æппæт дунейыл. Йæ юбилей ансамбль сбæрæг кодта ирд концертæй.
