Хъæлæс кæныны иумæйаг бонты фæткхæлдтытæ ма æруадзын. Куыд бæрæг кӕнгӕ æмæ иуварс кæнгӕ сты фæлывд митӕ? Уый тыххæй республикæйы æхсæнадон цæстдарджытæн радзырдтой семинары. Йæ фæлтæрддзинад нæ бавгъау кодта ассоциаци «Независимый общественный мониторинг»-ы эксперт Михаил Полянский. Фембæлд бацæттæ кодтой æхсæнадон палатæ æмæ регионалон центрон æвзæрстыты комитет.
Æвзæрстытæ æмбæлгæ уагыл бацæттæ кæнын. Уæд хатдзæгтæ дæр æнæмæнг уыдзысты раст. «Æхсæнадон хæдбар цæстдард»-ы эксперт, педагогон наукæты доктор, профессор Михаил Полянский бацæттæ кодта Дзæуджыхъæуы æхсæнадон цæстдарджытæн семинар.
Æхсæнадон цæстдарæг бæстонæй радзырдта æхсæнадон цастдарджыты бартæ æмæ хæсты тыххæй. Цæмæй æвзæрстытæ æнæфæлывдæй ацæуой, уый тыххæй сæм расидтис лæмбынæг хъус дарынмæ. Презентацийы æмæ лекциты æххуысæй æрхаста цæстдарджыты хи дарыны фæткы дæнцæгтæ. Эксперт куыд фæнысан кодта, афтæмæй оппозицийы фарсыл чи хæцы, уыдон алыхуызон фæрæзтæй архайынц Уæрæсейы думæмæ æвзæрстытæ свæливын. Уымæ гæсгæ, ахæм мæнгдзинæдтæ рабæрæг кæнынæн цæттæгонд æрцыдысты сæрмагонд мадзæлттæ.
Æхсæнадон цæстдарды уæнгтæн ма хорз æххуыс у «Æхсæнадон хæдбар цæстдард»-ы доклад. Фæнысан кæндзыстæм, уый æмæ республикæйы æхсæнадон палатæ, уагдæттæ æмæ политикон партиты разыйæ снысан кодтой 700 адæймагæй цæстдарджыты иугонд.
Уæ зæрдыл уын æрлæууын кæндзыстæм, æмæ цæмæй каронавирус ма рапарахт уа, уый тыххæй паддзахадон думæмæ æвзæрстытæ цæудзысты 3 боны — 17-18, æмæ 19 сентябры. Ныридæгæн бацæттæ кодтой 335 æвзарæн хайады, уыдонæй 23 рæстæгмæ хайæдтæ.
