Ирон æвзаг æмæ культурæ бахъахъхъæныны æмæ парахат кæныны нысанимæ. “О государственных языках” закъоныпроекты райрæзтыл æрныхас кодтой Æхсæнадон палатæйы. Кусæг къорд снысан кæнын бахæс кодта регионы разамонæг Сергей Меняйло. Абон уыд йæ фыццаг æмбырд. Разамынд ын дæтты истори æмæ археологийы институты директор Бзарты Руслан.
Йæ уæнгтæ систы раззагдæр филологтæ, юристтæ, æхсæнады минæвæрттæ – нæ национ хæзантæм куыдфæндыйы цæстæй чи нæ кæсы, уыдон се ‘ппæт дæр. Ныридæгæн бæрæг сты документы нысантæ æмæ хæстæ барадон бындурыл, снысан кодтой куысты пълан дæр. Разæй историктæ, мадæлон æвзаг æмæ литературæйы ахуыргæнджытимæ фембæлдтытæ.
Уæрæсейы адæмты æвзæгтæ бахъахъхъæнын цас ахсджиаг у, уый тыххæй раздæр загъта Владимир Путин. Президент фæнысан кодта, ныхас цæуы паддзахады ‘рдыгæй системон æххуысыл.
