Цæгат Ирыстоны хицауады сæрдар Тускъаты Таймураз радон хатт кæсы арæзт цы социалон объекттæ цæуынц республикæйы, уыдонмæ. Премьеры куыстадон балц райдыдта тарниздзæбæхгæнæн диспансерæй.
Тускъаты Таймураз æркаст, куыд цæуынц куыстытæ, уымæ. Ныртæккæ дзы 11 корпусæй цæттæ сты 4. Райдыдтой дзы медицинон кусæнгарзтæ æвæрын. Куыстытæ фæвæййынц ноджы 2 корпусы дæр. Уымæй уæлдай ма хицауады сæрдар бабæрæг кодта Национ музей дæр. Æркаст йæ рацарæзт куыд цæуы, уымæ. Тагъд фондæвæрæн сифтонг кæндзысты ног кусæнгарзæй.
Тускъаты Таймуразæн ма равдыстой Дзанайты Азанбеджы куыстыты равдыст дæр. Ныртæккæ музейы фенæн ис йæ 130 куысты. Республикон национ музей цалцæггонд фæуыдзæн иннæ азы кæрон. Тускъаты Таймураз ма æркаст Горæтгæроны районы хъæутæ Ир æмæ Дачныйы арæзт цы сывæллæтты рæвдауæндæттæ цæуынц, уыдонмæ. Дыууæ уагдоны дæр сты æмхуызон. Куыстытæ дзы цæуынц æнтыстджынæй. Ног ахуыргæнæндæтты руаджы Горæтгæроны районы ныййарджыты сæ сывæллæтты рæвдауæндонмæ раттыны тыххæй рады лæууын нал хъæудзæн. Хицауады сæрдар ма абон бабрæг кæндзæн Æрæфы район дæр. Уым та фендзæн, сæ культурæйы хæдзар куыд цалцæггонд цæуы, уый.
