Æнæнхъæлæджы цауты министрады Цæгат Ирыстоны сæйраг управлени ивгъуыд азы цæрджыты фыдбылызтæй бахъахъхъæдта. Æппæт хæстæ дæр бæстонæй баххæст кодта. Ахæм бæрæггæнæнтæ æрхаста управленийы разамонæг Александр Хоружий. Видеоконференцийы руаджы æмбырды архайдтой республикæйы хицауады сæрдар Тускъаты Таймураз æмæ вице-премьер Томайты Ирбег.
Александр Хоружий куыд бафиппайдта, афтæмæй æмгуыстады руаджы æххуыс уыдзысты цæрджытæн. Ахсджиагдæр хæсты ‘хсæн – диспетчерты службæйы куыст фæхуыздæр кæнын æмæ республикæйы зынгсирвæзтыты ныхмæ тохгæнæг службæйы райрæзт. Афтæ ма – зынгсирвæзтыты ныхмæ цæттæдзинад социалон объекты фæхуыздæр кæнын дæр.
Куысты хатдзæгтæм гæсгæ хуыздæр муниципалон скондыл банымадтой Алагиры район. Раззагдæр æххæстгæнæн территориалон оргæн сси Уæрæсейы фæлхасгæнджытæм цæстдарды управлени. Зæрдылдарæн лæвæрттæй ма схорзæхджын кодтой управленийы хуыздæр кусджыты.
