Диспансеризаци, хостæй ифтонгад, финансон-хæдзарадон архайд. Æппæт ацы фарстатыл ныхас цыд æнæниздзинад хъахъхъæнынады къабазы райрæзты фæдыл æмбырды. Амыдта йæ хицауады сæрдар Дзанайты Барис.
Дзуапдæттæг министр Тебиаты Сослан куыд фехъусын кодта, афтæмæй афæдзы æрдæгмæ диспансеризаци ацыдысты 124 мин адæймаджы, уый нысангонд пъланæй фылдæр у. Бæстæйы æнæниздзинад хъахъхъæнынады министрады статистикæмæ гæсгæ, Цæгат Ирыстон ацы хъуыддаджы ис раззагдæр регионты ‘хсæн. Дзæуджыхъæуы фыццаг рæнхъыты сты фыццæгæм, цыппæрæм æмæ æвдæм поликлиникæтæ, уыимæ ма Дыгуры, Æрыдоны æмæ Мæздæджы районты медицинон куыстуæттæ.
Ацы аз аст сæдæ æстай милуан сомы радих кæндзысты, льготæтæ кæмæн æмбæлы, уыцы цæрджытæн хостæн. Ацы хъуыддагæн регион уæлæмхасæн райста 97 милуан сомы. Льготæмæ гæсгæ хостæ нæ республикæйы дæттынц 39 пункты. Дæрддзæф районтæм сæ хæццæ кæнынц медицинон кусджытæ, цæмæй пациенттæ сæхæдæг районтæм ма цæуой.
