Æнæзакъонæй цы бырондæттæ фæзынд, уыдон аиуварс кæнынæн Уæрæсейы хицауад рахай кæндзæн æхцайы фæрæзтæ. Бæлвырддæр дзургæйæ, Цæгат Ирыстонæн, Татарстанæн, Липецкы, Тулæйы æмæ Дæллаг Новгороды облæсттæн.
Æмткæй райсгæйæ, фарста аиуварс кæнынæн рахай кæндзысты 3 млрд æмæ 500 мин сомы. Уый тыххæй сæрмагонд æмбырды рæстæг фехъусын кодта Уæрæсейы хицауады сæрдар Михаил Мишустин. Куыд бафиппайдта, афтæмæй бырондæттæ аиуварс кæндзысты федералон проект «Чистая страна»-йы фæлгæты. Уый ис национ проект «Экология»-йы дæлбар. Æппæт мадзæлттæ дæр баххæст кæндзысты æртæ азы æмгъуыдмæ. Премьер-министр куыд фæнысан кодта, афтæмæй ацы аз хъуыддагæн рахай кæндзысты 1 млрд сомы. Уый фадат ратдзæн, Цæгат Ирыстоны æнæзакъонæй цы бырондæттæ фæзынд, уыдон рекультиваци скæнын.
