Нæ бæстæйы спорты уарзондæр хуызтæй иу у самбо. Ныр дзы чи архайы, уыдонæн фæзынд фадат Олимпаг уæлахизтæм тырнын. Æппæтадæмон олимпаг комитеты 138-æм æмбырды Токиойы, самбойæн скодтой стыр аргъ. Ныр зæрдæ дарæн ис, æмæ 2028-æм азы Лос-Анжелесы нæ бæстæйы самбисттæ Олимпаг хъæзтыты гауызмæ рахиздзысты.
Кодзырты Солæман къуххæсты спорты хуызтæ йæ сабийы фæстæмæ цымыдис кæнынц. Уæд райдыдта цæуын дзюдойы æмæ самбойы секцитæм. Цыбыр рæстæджы фæстæ равзæрста самбо, йæ зæрдæмæ тынгдæр фæцыд. Ныр 11 азы дæргъы архайы йæ уарзон спорты хуызы. Æнтыстдзинæдтæ дæр ын ис. Архайдта Уæрæсейы ерысты, у республикон турнирты уæлахиздзау. Куыд зæгъы, афтæмæй сæйрагдæр у хиуыл кусын æмæ æвæллайгæйæ цæуын æвæрд нысæнттæм.
Соламон æмæ йе ‘мбæлтты бæллиц у Олимпаг хъæзтытæы уæлахиздзаутæ суæвын. Æрæджы дæр ма сын уыцы гæнæн нæ уыд. Спорты хуыз сæ программæмæ хаст нæ уыд. Ныр уавæр фæивта æмæ йæм Æппæтадæмон олимпаг комитет йе ‘ргом раздæхта. Дарддæр ма хъæуы, цæмæй йæ бафтауой 2028-æм азы Лос-Анжелесы Олимпиадæйы программæмæ.
Самбойы секцитæ ис Дзæуджыхъæуы, Горæтгæрон æмæ Рахизфарсы районты. Спорты хуызæй архайынц 500-йы бæрц сывæллоны. Раздæр-иу раивтой дзюдо кæнæ хъæбысæй хæстмæ, цæмæй сын фæзындаит Олимпаг хъæзтыты бацархайыны фадат. Ныр сæ уый нал бахъæудзæн.
Цæгат Ирыстоны самбойы федераци байгом кодтой 2003-æм азы. Республикæйы кусы 16 профессионалон тренеры. Ныр-иу фæсивæд сæ зонындзинæдтæ æмæ фæлтæрддзинад æвдисдзысты æппæтæй бæрзонддæр æмвæзадыл – Олимпаг хъæзтыты.
Дзæдзойты Фатимæ
