Цæгат Ирыстоны сæргълæууæг Битарты Вячеславы уынаффæмæ гæсгæ, æппæтуæрæсеон адæмон фронт æмæ æсхæнадон палатæйы минæвæрттæ бæрæг кæнынц социалон объектты уавæр. Арæзт æрцыдысты фæстаг дыууæ азы. Рейды рæстæг федтой Æрыдон районы сывæллæтты спортивон фæзы уавæр. Æрæфы районы та – рæвдауæндон æмæ культурæйы галуан.
Бæрæгъуыны сывæллæтты спортивон фæз сарæзтой 2 азы размæ. Фæлæ, йæ уавæрмæ фиппаинæгтæ разынд. Бирæ рæтты хызæг асъкуыд. Футболон дуæрттæ куыд æмбæлы, афтæ фидаргонд не сты. Уый та сывæллæтты æдасдзинадæн тæссаг у.
Баскетболæй хъазынæн цæгтæ дæр тыд æрцыдысты. Фæз дзаг у бырæттæй. Æппæтуæрæсеон адæмон фронты уæгнтæ куыд фæбæрæг кодтой, афтæмæй фæз хъуамæ искæй бæрны уа, цæмæй йæ æмбæлгæ уавæры дарой. Дарддæр фронты уæнгтæ сæ фæндаг акодтой Æрæфы районмæ. Бабæрæг кодтой Советскийы сывæллæтты ног рæвдауæндон. Бæстыхайы пъадвалы арæх æмбырд кæны дон. Уыимæ ма, рæвдауæндоны ис хи канализаци, фæлæ нæ кусы.
Æпæтæуæрæсеон адæмон фронт æмæ Æхсæнадон палатæйы минæвæрттæ федтой, сывæллæттимæ цы уавæрты кусынц, уый. Рæвдауæндоны бынат ис 120 сабийæн. Алы къордæн дæр ис йæхи хуыссæн æмæ хъазæн уæттæ. Бæстыхайы къултæ пъадвалы уымæлæй ранæй-рæтты хъуына кæнынц. Кæмдæр иу афаз сты. Ног пъолтæ дæр акъуыпп сты. Хъæндзинæдтæ уайтагъд дæр цæст æрцахсы.
Рейды рæстæг федтой Цыколайы культурæйы галуаны уавæр дæр. Бындурон цалцæг кæнын æй райдыдтой 2018 азы. Раивтой хъармгæнæн, дондзæуæн æмæ рухсдæттæн системæтæ. Сног кодтой къултæ, концертон æмæ кафæн залы пъолтæ дæр. Фæлæ, сæ уæлцъары ранæй рæтты зыхъыртæ фæзынд. Куыстытæ æххæстгæнæг компанийы минæвæрттæ бахæс кодтой, хъæндзинад аиуварс кæнын.
Социалон объектты уавæр сбæрæг кæндзысты республикæйы æппæт районты дæр. Фиппаинæгтæм гæсгæ сараздзысты акттæ. Даррдæр сæ арвитдзысты профилон ведомствæтæм. Цыбыр рæстæгмæ ма сараздзысты ног рейд. Хъæндзинæдтæ аиуварс кодтой, уый сбæрæг кæнынмæ.
Хуасдзауты Алинæ
