Ацы ахуыры азы райдианæй скъоладзаутæн райдыдтой тæвд хæринаг хæрын кæнын. Ахæм хъæппæрис разынд Уæрæсейы президент Владимир Путинмæ. Хицауад йæ фарс рахæцыд. Ныр ацы закъон йæ тыхы ис Цæгат Ирыстоны дæр. Сабитæ аходæн æмæ сихор хæрд кæнынц ахуыргæнæндæтты лæвар. Скъолаты хæрæндæтты уавæр абон сбæрæг кодтой Æппæтуæрæсеон адæмон фронты регионалон хайады уæнгтæ.
Дзæнгæрæг радтой æмæ скъоладзаутæ сæ фæндаг кæнынц хæрæндонмæ. Фынгтыл цалдæр хуызы хæринæгтæ салаттæ, тæвд хæринаг, дзидза, карчы фыд æмæ кæсаг. Семæ сын гарнирæн æфтауынц картофы ссæст, сауфагæ æмæ мæнæуы фых, макъаронтæ кæнæ къабуска сурвыхæй. Уымæй уæлдай ма менюйы дыргътæ, цай, какао, дыргътæ æмæ халсарты дæттæ. Ахуырдзауты аходæн ныр уыдзæн ахæм. Хæринæгты хæрзхъæддзинадмæ кæсынц Æппæтуæрæсеон адæмон фронты уæнгтæ. Фыццаг бабæрæг кодтой Дзæуджыхъæуы 5-æм гимназ. Æхсæнадон архайджытæ уавæрæй разыйæ баззадысты.
Райсомæй раджы къæбицы кусæнгæрзты уавæр, хойрæгты хæрзхъæддзинад фенынц специалисттæ. Кусджыты бабæрæг кæнынц дохтыр æмæ медицинон хо. Алы хæринагæй дæр исынц иртæстытæ. Уазалгæнæны сæ хъуамæ фæдарой 48 сахаты. Ам алы хойрагæн дæр йæхи бынат ис. Уæдæ сабиты рады куыд лæууынц, уымæ дæр каст цæуы.
33-æм скъолайы басгæрсты архайджытæ хъæндзинæдтæ сæхимæ фæнысан кодтой. Фæткмæ гæсгæ хъуамæ меню ауыгъд уа хæрæндоны. Уыимæ ма æххæст кæной сæрмагонд гæххæттытæ. Хæринаг, бæстыхайы уавæр æмæ продукттæ куыд дарынц, уый зæрдæхсаинаг нæу. Скъолайы разамонæг куыд фæнысан кодта, афтæмæй ногдзинæдтæм сæхи бæстонæй бацæттæ кодтой.
16-æм гимназы та аиппытæ бынтондæр нæ разынд. Сты раппæлинаг. Ам сывæллæтты сихормæ уæлдай æргом здахынц. Уыимæ ма хæрæндон æрæджы сцалцæг кодтой. Сабитæ зæрдæргъæвдæй тырнынц сихоры хæрд кæнынмæ.
Скъола хойрагæй ифтонг кæны горæты питанийы комбинат. Райдиан кълæсты ахуырдзаутæн тæвд хæринаг дæттыны хъæппæрис бахаста нæ бæстæйы президент Владимир Путин. Республикæйы скъолаты хæрæндæттæ ног домæнтæ æххæст кæнынмæ цæттæ сты. Хъæуы ма самал кæнын сæрмагонд кусæнгæрзтæ.
Æппæтуæрæсеон адæмон фронты регионалон хайады уæнгтæ фæнд кæнынц скъолатæ æппынæдзух бæрæг кæнын. Уыимæ ма республикæйы алы районы дæр. Уымæй уæлдай ма снысан кодтой æвæстиатон бастдзинады номыр. Ныййарджытæн сæ хъусынгæнинæг уырдæм фæхæццæ кæнын сæ бон у.
Уазиты Зæлинæ
