Æппæтуæрæсеон адæмон фронты уæнгтæ дарддæр бæрæг кæнынц, скъоладзаутæн куыд æмæ цы хæрын кæнынц, уый. Æппæт скъолатæн дæр ис аходæны иумӕйаг номхыгъд. Снысан æй кæны Фæлхасгæнджытæм цæстдарды управлени алы 10 бонæн дæр хицæнæй. Бæрнонæй кæсынц, сывæллæттæ фылдæр цы хæринаг уарзынц, уымæ. Ныййарджыты фæрстытæн дзуапп радтыны тыххæй адæмон фронты уæнгтæ бабæрæг кодтой Дзæуджыхъæуы 3-æм скъола æмæ 45-æм гимназ.
Скъоладзауты аходæны- дзул, нæлхæ, макъаронтæ, котлет æмæ цай. Райдиан кълæсты ахуырдзаутæ æрвылбон хæрынц хъарм хæринаг – алы бон дæр алыхуызон. Сабитæ сæ райсомы хæрдæй сты разы.
2020-ӕм ахуыры азы райдианæй хъарм хæринаг лæвар хæрынц райдиан кълæсты ахуырдзаутæ се `ппæт дæр. Ног домæнтæм республикæйы скъолатæ сæхи бацæттæ кодтой бӕстонӕй. Хæрæндæттæ сты цалцæггонд æмæ ифтонггонд хъæугæ кусæнгæрзтæй. Фæлæ уæддæр ныййарджытæм хатгай алыхуызон лыстæгдзинæдты тыххæй фæзыны фарстатæ. Ныр дæр Æппæтуæрæсеон адæмон фронты уæнгтæ бабæрæг кодтой Дзæуджыхъæуы 3-æм скъола æмæ 45-æм гимназ. Куыд загътой, афтæмæй сæм бацыди хъæстытæ, хæринаг тæвд кæй нæ вæййы, уый тыххæй.
Дзæуджыхъæуы 3-æм скъолайы хъарм хæринаг хæрынц 360 ахуырдзауы. Скъола 2 фæлтæрæй кæй кусы, уый тыххæй сывæллæттæй иутæ фæхæрынц сихорæй. Уыцы ахуырдзаутæн сæ хæринæгты хыгъдмæ хаст æрцыди ивддзинæдтæ. Фæхæрынц хъæрхуыпп дæр.
Уæдæ аив у 45-æм гимназы хæрæндон дæр. Ам хъарм хæринаг хæрынц райдиан кълæсты 429 ахуырдзауы. Хæрæндоны ис 162 бынаты. Уый тыххæй сывæллæттæ ам дæр хæрынц радыгай. Фæлæ уый тыххæй ницы къуылымпыдзинæдтимæ æмбæлынц. Куыст у фæткмæ гæсгæ. Сабитæ дæр разыйæ баззайынц. Уый бæрæг у тæбæгъ кæй раафтид кæныц, уымæй дæр.
Эксперттæ лæмбынæг æркастытсты кусæн бынæтты сыгъдæгдзинадмæ, куысты фæткмæ. Сбæрæг кодтой хæринæгты тæвды бæрц æмæ уæз. Æппæтуæрæсеон адæмон фронты регионалон хайады уæнг Бериты Олег куыд фæнысан кодта, афтæмæй йæ зæрдæмæ цæуы, скъолаты кæй ис буфеттæ дæр. Уый фæрцы хистæр кълæсты ахуырдзауты бон дæр у аходæн скæнын. Фæзынди йæм фиппаинаг дæр.
Æппæт фиппаинæгтæ арвитынц Фæлхасгæнджытæм цæстдарды управленимæ æмæ Ахуырады министрадмæ. Уыдон лæмбынæг æркæсынц уавæрмæ. Фиппаинæгтæ цы скъолаты ссарынц, уырдæм дыккаг хатт дæр æрбацæуынц бæрæггæнæг.
Ныртæккæ нæ республикæйы сæггълæууæг районтæн бабар кодта куыстмæ лæмбынæгдæр æркæсын. Бæрæг кæндзысты сабитæн хъарм хæринаг хæрын кæныны хъуыддаг хъæуты куыд æххæст кæнынц, уый дæр.
Дзæдзойты Фатимæ
