Сунжæйы хъæуы скъола ныр Æппæтуæрæсеон адæмон фронты минæвæртты хъæппæрисæй хæсдзæн авиацийы инæлар -майор Бедойты Русланы ном. Уæ зæрдыл уын æрлæууын кæндзынæн программæ «Имя героя – школе» 2014 азæй нырмæ æххæстгонд цæуы федералон проекты хуызы. Йæ сæйраг нысан — скъоладзауты зæрдæты гуырын кæнын нæ бæстæйы историмæ уарзондзинад. Бæлвырддæр нæ дарддæры æрмæджы.
Скъолайы кæрты адæмæй къух бакæнæн дæр нæй. Скъоладзаутæ, рауагъдонтæ, ахуыргæнджытæ, — иууылдæр ам. Ис ма дзы Æппæтуæрæсеон адæмон фронтæй, республикæйы ветеранты Советы, ахуырад æмæ наукæйы министрады минæвæрттæ, районы æхсæнад. Хуымæтæджы не`рымбырд сты. Сунжæйы хъæуы сæйраг иумæйагахуырадон скъолайæн радтой авиацийы инæлар-майор Бедойты Русланы ном.
Бедойты Русланы ном хъуыстгонд у канд Ирыстоны нæ, фæлæ ма суанг фæсарæнты дæр. Уый 30 азæй фылдæр службæ кодта æфсæддон-уæлдæфон тыхты рæнхъыты. Дыууæ хатты æххæст кодта йæ интернационалон хæс — арвы тыгъдады хъахъхъæдта Египет æмæ Йемены сæрмæ уæлдæфон тыгъдад. Сæ зындгонд рауагъдон скъолайы рох никуы уыд.
Мадзалы фæлгæты Русланы тыххæй мысинæгтæ æргом кодтой уазджытæ дæр. Сунжæйы хъæуы сæйраг иумæйагахуырадон скъолайæн авиацийы инæлар -майор Бедойты Русланы ном кæй радтой, уый тыххæй сæрмагонд æвдисæндар айста скъолайы разамынд. Уымæй уæлдай-ма ахуыргæнæн уагдоны къулыл бакодтой номарæн фæйнæг. Уый та къухы бафтыд Горæтгæрон районы администрацийы фæрцы, æххуыс сын кодта инæлар-майоры хо Бедойты Людмилæ.
Ныр Сунжæйы хъæуы скъола хæссы Бедойты Русланы ном.
Мадзал арæзт æрцыд Æппæтуæрæсеон адæмон фронты акци «Имя героя — школе»- йы фæлгæты
Æппæтуæрæсеон адæмон фронты проект «Имя героя — школе»- йы фæлгæты хъæбатырты нæмттæ радтой нæ республикæйы 32 скъолайæн. Уыдонæй 11 Мæздæджы районы скъолатæ.
