Фæзыл – пурти байсыныл карз тох. Командæты фарсдартæ дæр тыхсынц, æнхъæлмæ кæсынц бæллиццаг голмæ. Ацы сабитæн абон дебют ис. Ахæм ерысты фыццаг хатт архайынц æмæ сæ арæхстдзинад равдисынмӕ тырнынц. Лæппуты фæнды Мессийы хуызæн хъазын. Уырны сæ, фидæны йемӕ кæй фембæлдзысты æмæ йын, æнæмæнг, кæй радзурдзысты, футболисттæ уымæ гæсгæ кæй систы, уый. Гыццыл Леойыл дæр 5 азы цыди, футболæй хъазын куы райдыдта, уæд. Чи зоны, ацы сывæллæттæм дæр стыр фидæн æнхъæлмæ кæсы. Æппæтуæрæсеон фестиваль «Футбол в школе»-йы архайд та у фыццаг къахдзæф.
Цæмæй рæзгæ фæлтæр йе ‘ргом раздаха дунейы æппæт адæмты уарзондæр спортмæ, сæрмагондæй уый тыххæй арæзт у проект «Футбол в школе». Йæ фæрцы сывæллæттæ исынц фæлтæрддзинад æмæ свæййынц дæсны футболисттæ. Уæдæ тренертæн дæр хорз гæнæн у курдиатджын сывæллæтты раиртасынæн.
Фестиваль ацыд ахуырады центр «Интеллект»-ы бындурыл. Архайдтой дзы 180 лæппу æмæ чызгæй фылдæр. Мадзалы сæйраг хъуыдытӕй ма иу уый мидæг ис, æмæ фæсивæд иууылдæр систы уæлахиздзаутæ. Сызгъæрин майданæй сæ алкæй дæр схорзæхджын кодтой.
Уæрæсейы футболон Цæдисы проекты архайынц Цæгат Ирыстоны 17 ахуырадон уагдоны. Иууылдæр райстой инвентарь тренировкæ кæнынæн. Ныр æрыгон футболисттæн сæ уарзон спортæй архайынæн фылдæр гæнæнтæ ис. Æдæппæтæй проект æххæссы 83 регионыл æмæ 4 150 скъолайыл æгас бæстæйы.
Дзæдзойты Фатимæ
