Фæндыры зæлтæ айхъуыстысты æгæс Ирыстоныл – Цæгатæй Хуссармæ. Фыццаг телеконкурс «Фæндырмæ» йæ фæндаг æнтыстджынæй акодта республикæйы районтыл, бахоста не `фсымæрон сыхæгты дуар дæр. Кæддæр Иры дзыллæйы хуыздæр фæндырдзæгъдджытæ Зилахармæ тындзыдтой. Уым æмæ-иу ирон адæмы стырдæр бæрæгбæтты рæстæг сæ курдиат равдыстой. Афтæмæй-иу сын сæ нæмттæ базыдтой комæй-коммæ. Хорз фæндырдзæгъдæджы кад та егъау уыд. Ирон адæмы рагон инструменты зæлтæ бирæ æнусты адæмæн хæссынц циндзинад æмæ рæсугъд æнкъарæнтæ.
Рухс, сæфиттæ, камерæтæ, музыкалон инструменттæ… Фæндырдзæгъдджыты сæйраг конкурсы архайджытæ кæд гыццыл тæрсынц æмæ катай кæнынц, уæддæр сæ студи разæнгард кæны сæхи хуыздæр равдисынмæ. Сæйрагдæр та – сæйраг приз рамбулынмæ. Сæ фылдæр хæдахуыр музыканттæ сты. Фæлæ уый нæ хынцгæйæ фидарæй зæгъæн ис раздæры фæндырдзæгъдджыты фæлтæрæн аккаг кæстæртæ кæй сты. Ирон фæндырмæ хъæрмуд ахастдзинад сæм зæрдæйæ цæуы. Æмæ нæм фæлтæрæй-фæлтæрмæ цы адæмон музыкæ æрхæццæ, уый зæлтæ парахат кæнын æмæ йæ иннæ фæлтæртæн дæр бахъахъхъæнын.
Архайджытæй иутæм ахсджиаг кæсы йæ курдиат равдисын, чи та йæ тыхтæ бафæлварынмæ æрбацыд. Фæлæ йæ жюрийы уæнгтæ хуыздæрты номхыгъдмæ бахастой æмæ ныр, йæхæдæг дæр æнхъæл нæ уыд афтæ, ис æрдæгфиналы.
Конкурс дыууæ хайæ конд уыд. Фыццаг – сывæллæты хсæн, дыккаг та – хистæр архайджыты. Къамисы уæнгтæ æмæ нæ телекомпанийы къорды кусджытæ дзы равзæрстой 20 адæймагæй фылдæр. Сæ иу – Майлыты Еленæ Цыколайæ. Йæхи иннæтæй лæмæгъдæрæй нæ равдыста. Тындзы уæлахизмæ – йæ бæллицтæ сæххæст кæнынмæ. Цæхи цас хъуыды кæны, уæдæй фæстæмæ архайы музыкалон дæсныйады сусæгдзинæдтæ раргом кæныныл. Уый цыбыр рæстæг нæу. Ацы къæпхæны æхи ныфсджынæй кæй равдыста, уый дæр, æвæццæгæн, хуымæтæджы нæу.
Районты æвзарæн къпхæнтæ куы уыдысты, уæд къамисы уæнгты сагъæс фылдæрæй-фылдæр кодта. Фæндырдзæгъджытæй иуæй-иннæ хуыздæр, сæ арæхстдзинад хуыздæрæй-хуыздæр. Уæлахиздзауы равзырын та зындæрæй – зындæр.
Цымыдысаг равдыстытæ, курдиатджын архайджытæ æмæ фæндыры зæлланг. Ахæм уыд æрдæгфинал.
Дарддæр та конкурсы архайджытæм цы æнхъæлмæ кæсы, уый уын не схъæр кæндзыстæм. Уæвгæ, финалисттæ йæ сæхæдæг дæр нæ зонынц. Æнæмæнг, сæ хъæудзæн сымах æххуыс дæр. Уæдмæ та уал финалы æркастмæ нæ эфиры кæсут сабаты æмæ хуыцаубоны изæры 9 сахатыл.
Гогаты Марат
