Æрыдоны Дзугаты Бартуйы номыл Культурæйы хæдзары ног уаддзæф бауагътой. Бæстыхай бындуронæй сцалцæг кодтой. Къорд рæстæджы размæ Æрыдоны цæрджытæ культурæйы хæдзары уавæры тыххæй радзырдтой республикæйы сæргълæууæг Битарты Вячеславæн. Афтмæмæй адæмы æхсызгон лæвармæ бирæ æнхъæлмæ кæсын нæ бахъуыд. Ныр бæстыхай йæ хуыз скалдта. Ног рудзгуытæ, дуæрттæ, райдзаст кусæнуæттæ. Культурæйы артдзæсты кусджытæ куыд зæгъынц, афтæмæй ныр æхсызгондæрæй кусынц.
Дзугаты Бартуйы номыл культурæйы хæдзары айзæлдысты адæмон инструментты зæлтæ. Ног, цалцæггонд, райдзаст бæстыхаймæ кусджытæ рагæй æнхъæлмæ кастысты. Брциаты Оксанæ бирæ азты дæргъы кусы культурæйы артдзæсты. Фидарæй зæгъы, ног уавæрты ныр зæрдæрайгæйæ архайдзысты.
Бæстыхайæн ногæй раивтой йæ сæр, сæвæрдтой дзы ног рудзгуытæ æмæ дуæрттæ. Мидæггаг куыстытæ дæр баххæст кодтой. Уыимæ ма йын йе ‘ддаг бакаст дæр банывыл кодтой. Культурæйы хæдзарыл æнусæй фылдæр цæуы. Уыцы рæстæгмæ бындурон цалцæггонд никуы уыд. Бæстыхайы историон хуыз куыстыты фæстæ нæ аивта.
Культурæйы хæдзары архайынц алыхуызон сфæлдыстадон къордтæ. Националон кæфтытæ, хореографи, театралон къордтæ. Сæ курдиæттæ раргом кæнынæн аивады суинаг стъалытæн дзы ис æппæт уавæртæ дæр.
Хуасдзауты Алинæ
