Вакцинаци коронавирусы ныхмæ дарддæр цæуы Цæгат Ирыстоны. Алагиры районы сæйраг рынчындоны прививкæтæ скодтой 5 адæймаджы, иууылдæр – барвæндонæй. Куыд зæгъынц, афтæмæй æнæниздзинад хъахъхъæнынæн вакцинæ у ахсджиаг хъуыддаг. Бынæттон цæрджытæй уæлдай ма привикæтæ кæнынц медицинон кусджытæ дæр.
Коронавирусы низы фыццаг бонтæй фæстæмæ Айдарты Зоя йæхицæн снысан кодта, вакцинæ цы бон фæзына, уыцы бон æй уайтагъд кæй скæндзæн. Йе `нæниздзинадæн æй фæлварæнтæ аразын нæ фæнды, уæлдайдæр инфекци æгъатыр куы уа, стæй йæ фаг куы нæма сахуыр кæной, уæд. Вакцинæ сылгоймаг хоны хорз фæрæз хи бахъахъхъæнынæн. Канд йæхи дзы нæ бахиздзæн фыдбылызæй, фæлæ ма йæ къабæзты дæр. Привикæ скодта барвæндонæй.
Вакцинаци ацæуын Алагиры районы сæйраг рынчындоны сфæнд кодтой 5 адæймаджы. Ныр уал ын райстой йæ фыццаг хай. 3 къуырийы фæстæ та скæндзысты прививкæйы дыккаг хай. Вакцинацийы размæ адæймагмæ лæмбынæг æркасы терапевт. Сбæлвырд ын кæны йе `нæниздзинад æмæ уыйфæстæ рахæссы æмбæлгæ уынаффæ.
Прививкæйы фæстæ адæймаг кæд æмæ хъаст ницæмæй ракæна, уæд æй ауадзынц хæдзармæ. Иртæстытæ куы амонынц, афтæмæй коронавирусы ныхмæ тохгæнæг чырæгтæ равзæрынц вакцинацийы дыккаг къæпхæны фæстæ.
