Лæппутæ автомат иттæг хорз райхæлдтой – сарӕхстысты 15 секундмӕ. Уыйбӕрц рӕстӕг бахъуыд чызджыты дӕр. Лӕппутӕн сӕ архайд хӕццӕ кӕны автоматизммӕ – ӕмбырд дӕр афтӕ ӕнцонӕй къухы ӕфты. Йӕ фарсмӕ офицер-ахуыргӕнӕг Бигъуылаты Юрий. Уый алы фезмæлдмæ дæр бæстон кæсы. Кадетты къласы алы ахуырты дӕр йӕ зонындзинæдтыл нæ бацауæрды.
Теорийы фӕстӕ та – практикон ахуыр нӕмыгӕй ӕхсынӕй. Æфсæддон цауты ветеранæй зонындзинӕдтӕ райсын кадеттӕн кады хос у. Фӕсивӕд сӕхи ныфсджынӕй ӕнкъарынц бирӕ дисциплинӕты. Ӕмбырд куы расидтысты, уӕд Мсойты Элинӕ фидарӕй загъта, кадетты къласы кӕй ахуыр кӕндзӕн, уый. Цы ногдзинæдтæ райста, уыдон ӕй фидӕны бахъӕудзысты..
Кадетты кълас Хъӕдгӕроны скъолайы байгом кодтой 2021 азы. Конкурс уыд стыр, абон дзы ахуыр кӕны 20 адӕймаджы. Патриотон хъомылады куыст ам егъау у. Фӕсивӕд æппынæдзух архайынц алыхуызон конкурсты.
Æрыдоны 2-æм скъолайы кадетты къласы ахуыр баст у фыццаг медицинон ӕххуыс бакӕнынимæ. Арӕхстдзинӕдтыл бакусынц сӕрмагонд тренажер-манекеныл. Æрымысгæ цаумæ гӕсгӕ лӕг бауадзыг. Ӕнӕмӕнг базонын хъӕуы, йӕ зонд йӕхимӕ ис ӕви нӕ. Ӕмӕ дарддæр уый хынцгӕйӕ архайын.
Дарддӕр хӕс ахсджиагдæр кӕны: адӕймагæн йе уӕнгтæ асастысты. Лекъты Хетӕг зоны, уыцы уавӕры дӕр куыд архайын хъӕуы, уый. Ӕвзонг кадет йӕ алы архайдӕн дӕр дзуапп дæтты.
Жгут сӕвӕрын кӕнӕ хъӕдгом бабӕттын. Кадетты къласы ахуыртӕ Хетӕг нæ цух кæны. Æвзонг лӕппуйы фӕнды йӕ цард медицинӕимӕ сбӕттын. Цы зонындзинӕдтӕ райста, уыдон æй бахъӕудзысты.
Ӕдӕппӕт кадетон къласы ахуыр кӕны 22 адӕймаджы. Педагог-отставкӕйы офицер Созайты Аланимӕ иумӕ бæстондæр ахуыр кӕнынц хӕстон тематикӕ, сӕхи цӕттӕ кӕнынц ӕркастытӕм, архайынц квизӕты, викторинӕты. Хъомылады сæйрагдæр нымайынц патриотизм.
Ӕрӕджы Ӕрыдоны районы кадетон кълӕстӕ уыдысты æнæнхъæлæджы уавæрты министрады ахуырты æрдзон зынгсирвӕзтытӕ аиуварс кӕныны тыххӕй. Лӕппутӕ федтой, ирвӕзынгӕнджытӕ арт хуыссын кӕнгӕйӕ куыд архайдтой, адӕмы ӕмӕ инфраструктурӕйы объекттӕ куыд хъахъхъӕдтой, уый. Фӕсивӕды ахӕм мадзӕлттӕм кӕнын у патриотон хъомылады ахсджиаг хай.
