Æрыдоны æмæ Дыгуры районты цы тæрккъæвдатæ æмæ тыхджын дымгæ ракодта, уыдон бахъыгдæрдтой бынæттон цæрджыты хæдзæрттæ. Æрдзон фыдбылызы фæстиуджытæ уæрæг сты. Æвзæр боныхъæды аххосæй афæлдæхтысты бæлæстæ, электрон тыхы телтæ бирæ рæтты аскъуыдысты. Уый тыххæй адæм æнæ рехсæй баззадысты. Сæрмагонд службæтæ бавнæлдтой фæстиуджытæ иуварс кæнынмæ. Райдыдтой уыцы бон æмæ ныр дæр ма цæуынц. Ныфс æвæрынц, аизæр адæмы хæдзæрттæм рухс кæй бакæлдзæн, уымæй. Не`сфæлдыстадон къорд абон уыди Æрыдоны районы. Хуасдзауты Алинæ радзурдзæн бæлвырддæр.
Боныхъæд расайдта æвзæр фæстиуджытæм. Тыхджын дымгæйы аххосæй электрон тыхдæттæг телтæ хъыгдард баййæфтой. Уыцы фæстиуджытæ аиуварс кæныныл ныридæгæн архайы 3 сæрмагонд къорды.
Æрмæст электрон тых нæ, фæлæ ма Æрыдоны цæрджытæм дон дæр нæй. Уымæн æмæ доцъирæнтæ электрон тыхимæ баст сты. Æрыдоны инженерон хызæгты кусджытæ архайынц, цæмæй хæдзæртты рухс ногæй фæзына. Дымгæ ахæм тыхджын уыд æмæ систа цалдæр бирæуæладзыгон хæдзары сæртæ. Цæрджытæ æрдзон фыдбылызы фæстиуджытæ сæхи тыхтæй дæр иуварс кæнынц.
Æрдзон фыдбылыз хи хæдзæртты дæр æнæ хъыгдардæй нæ ныууагъта. Кæм сын сæ сæр æнæхъæнæй фелвæста, кæм та- йæ кæцыдæр хай. Æвзæр боныхъæд зиан æрхаста Æрыдоны 2 скъолайы æмæ 3 рæвдауæндонæн. Бæстыхæйтты сæртæ æнæ сæрæй аззадысты. Дымгæйы аххосæй базгъæлдысты рудзгуыты æвгтæ дæр. Афæлдæхтысты стыр бæлæстæ. Æрыдоны районы администрацийы куыд зæгъынц, афтæмæй æнæхъæлæджы уавæры фæдыл сымбырд кодтой сæрмагонд къамис. Йæ сæйраг нысан-æвзæр боныхъæд цавæр зиан æрхаста, уый сбæрæг кæнын.
Ныридæгæн уал фæндæгтæ ссыгъдæг кодтой цы бæлæстæ афæлдæхтысты уыдонæй. Æрыдоны администрацийы ныфс бавæрдтой цыбыр рæстæгмæ фыдбылызы фæстиуджытæ цыбыр рæстæгмæ аиуварс кæндзысты.
