Æвзæрстыты рæстæг æдасдзинады фарстатыл ныхас цыд республикæйы барадон фæтк æххæстгæнæг координацион æмбырды рæстæг. Амыдта йæ регионы разамонæг Сергей Меняйло.
Хъæлæс кæныны бонты 9-æм æмæ 10-æм сентябры республикæйы 5 районы: Алагиры, Æрæфы, Кировы, Горæтгæрон æмæ Рахизфарсы районы ацæудзысты бынæттон хиуынаффæйады оргæнтæм æвзæрстытæ. Æдæппæтæй 2- æвзарæн компанийы. Баивдзысты 116 депутаты мандаты. 10 хъæуы сæвзардзысты сæргълæуджыты.
Цæгат Ирыстоны центрон æвзарæн къамисы сæрдар Моргуаты Жаннæ куыд фехъусын кодта, афтæмæй республикæ цæттæ у хъæлæс кæнын иумæйаг бонмæ. Центрон æвзарæн къамис скусын кодта цифрон сервис «Мобильный УИК», зæгъгæ. Уæлæфтуаны руаджы æвзарджытæ исдзысты бæстондæр информаци. 249 кандидаты ацыдысты сæрмагонд иртæстытæ. Æвзарæн хайæдты ма кусдзæн видеоцæстдарды системæ. Республикæйы æхсæнадон палатæ бацæттæ кодта 124 æхсæнадон цæстдарæджы. Уыдон бынæтты кусдзысты хъæлæс кæныны бон. Æмбырды архайджытæ ма се ‘ргом аздæхтой ног ахуыры размæ скъолаты террористон фæзындтæй бахъахъхъæныны мадзæлттыл. Сергей Меняйло куыд фæнысан кодта, афтæмæй терроризмы ныхмæ æмæ зынгсирвæзты аххосæй фыдбылызтæм хъуамæ дзуапдæттæг ведомствоты кусджытæ æппынæдзух сæ хъус дарой. Сывæллæттæн æмæ ахуыргæнджытæн хъуамæ арæзт уа æппæт æмбæлгæ уавæртæ дæр. Ахуырад æмæ наукæйы министр Алыбегты Эллæ куыд радзырдта, афтæмæй дзуапддæтæг специалисттæ ныридæгæн федтой 520 ахуырады бæстыхайы. Цалцæг кæм цæуы, уыдонӕй уæлдай, ӕппæт скъолатæ цæттæ сты ног ахуыры азмæ. 1 æмæ 2-æм сентябры æппæт скъолаты дæр ацæудзысты сабырдзинады уроктæ. Ахуырадон аз та райдайдзæн 4-æм сентябры.
