«Æнæниздзинад хъахъхъæнынады» национ проекты фæрцы дæрддзæф хъæуты кусынц бынативгæ медицинон комплекстæ. Фелсырон-акушерон пункттæ, флюорографтæ æмæ маммографтæ. Ныридæгæн се ‘ххуысæй спайда кодтой Цæгат Ирыстоны 18 мин цæрæгæй фылдæр. Бынативгæ фелсырон-акушерон пункт кусы Алагиры районы дæр.
Тотиты Азæ цæры Нарыхъæуы. Ныртæккæ ам, йемæ иумæ, ис æрмæст 13 цæрæджы. Кæд ыл азтæ рацыд, уæддæр æнцад нæ бады. Хæдзары куыстытæй иу дæр æнæ кондæй нæ баззайы. Лæмбынæг кӕсы йе ‘нæниздзинадмæ дæр. Фæлæ хæххон хъæуы æнæ рынчындонæй цæрын зын у, — зæгъы сылгоймаг.
Фелсырон-акушерон пунктæн йæ куысты фæтк ныридæгæн нысангонд у. Дæрддзæф хъæутæм æрвылбон ссæуынц Мызуры амбулаторийы дохтыртæ. Цæрджытæй йе ‘нæниздзинад кæй хъыгдары æмæ чи цæмæй тыхсы, уый дæр хорз зонынц.
Пандемийы афон фелсырон-акушерон пункты куыст урӕд ӕрцыд. Фæлæ ныртæккæ дохтыртæ куысты раздæры фæткмæ раздæхтысты. Бынативгæ поликлиникæты руаджы медицинон æххуыс бакӕнынц алкӕмӕн афойнадыл. Фелсырон-акушерон пункттæ кусынц æртæ азы. Уыцы рæстæгмæ рабæрæг, цæрджытæн зынгæ кæй фенцондæр, уый. Медицинон æххуысы фæдыл дард цæуын æмæ æнхъæлмæ кæсын нал хъæуы.
