Афæдзы кæронмæ Цæгат Ирыстоны фæзындзæн амалхъом адæмæн æххуысы центр «Мой бизнес». Сараздзысты йæ национ проекты фæлгæты. Уый тыххæй куыстадон фембæлды фехъусын кодта республикæйы экономикон райрæзты министр Томайты Хъазыбег. Амалхъом адæмы фарстаты фæдыл куыстадон æмбырды сæрдариуæг кодта республикæйы сæргълæууæг Битарты Вячеслав. Ахсджиаг у центры лæггæдтæй канд Дзæуджыхъæуы бизнесментæ нæ, фæлæ районты амалхъом адæмæн дæр фадат куыд уа спайда кæнын, уый.
Æмбырды æрдзыдтой амлхъомады къабазы райхалинаг фарстатыл дæр. Битарты Вячеславы ныхæстæм гæсгæ чысыл æмæ рæстæмбис амалхъомдзинады рæзтыл республикæйы стыр куыст цæуы, фæлæ бæрæггæнæнтæй зæрдæ нæ райы. Къабазы кæмæн бантыст, уыдон сты стæмтæ. Уый ууыл дзурæг у гранттæ æмæ субсидитæ дæттæн системæйыл нырма бакусын кæй хъæуы. Паддзахадон æххуысы мезанизм куыд æмбæлы афтæ нæ кусы. Фыццаджыдæр хъæуы баххуыс кæнын æцæгæй дæр хъуыддагыл хæст чи у æмæ ног куысты бынæттæ чи аразы уыдонæн. Республикæйы сæргълæууæг уæлдай æргом аздæхта сæрмагонд фондты куыстмæ, ахуырадон семинартæ чи аразы, уыдонмæ. Арæх афтæ рауайы æмæ сæ куыст вæййы æнæпайда.
Сæйрагдæр та уыцы фондты ахуыртæ чи ацæуы, уыдон паддзахадон æххуысы тыххæй бæлвырд информаци афтæ дæр нæ базонынц. Уыцы фондтæ се`ргом хъуамæ раздахой æмæ æнгомдæр æмгуыст кæной амалхъом адæмимæ. Алыхуызон лæггæдтæ райсыны фæдыл фондмæ афæдзы райдианæй æххуысагур æрбацыд дыууæ мин адæймагæй фылдæр. Фонды специалисттæ лæвар скодтой 79 бизнес-планы. Баст уыдысты паддзахадон программæты архайдимæ æмæ зæххыты фарстатимæ.
