Æгæрон курдиаты хицау. Актёр æмæ кинорежиссёр Анатолий Шульев ссис Вахтанговы номыл театры сæйраг режиссёр. Йæ æвæрд спектакльтæ рауайынц æнтыстджын. Мæскуыйы егъаудæр театры сын аивадуарзджытæ скæнынц стыр аргъ. Йæ спекльтæ дзурæг вæййынц адæймаджы хуыздæр миниуджытыл. Режиссёры сфæлдыстадон фæндаджы тыххæй нæ дарддæры æрмæг.
Йæ архайд æмæ зондæй иннæты ‘хсæн бæрæг чи дары, уыимæ æгæрон курдиаты хицау чи у, уый – Анатолий Шульев. У ӕрыгон, стыр ныфсытæ кæимæ бæттынц, уыимæ цымыдисаг хъуыдытæй æмæ нысантæй æххæст адæймаг. Цæттæ у алыхуызон проекттыл дæр бакусынмæ æмæ сæ цардмæ рауадзынмæ. Лæппу йæхи хорз æвдисы куыд актерæй, афтæ кинорежиссерæй дæр. Ныр та ма ссис Вахтанговы номыл театры сæйраг режиссёр дæр. Ацы ахсджиаг æмæ æхсызгон хабар уайтагъд апарахат ис ивгъуыд къуыри. Уæвгæ, Анатолий Шульевæн йæ фæндаг дæр ардыгæй райдыдта. Сабийæ йæ мад фыццаг хатт йе ‘фсымæримæ æрбакодта сывæллæтты музыкалон театр «Премьерæ»-мæ.
Йе стыр курдиат куы фæбæрæг, уæд ын ӕй æххæстæй раргом кæныныл архайын райдыдтой. Азтæ куы рацыдысты, уæд Анатолий ацыд стыр сахармæ, уым æнтыстджынæй ахуыр кæнын райдыдта ГИТИС-ы. Бæлвырддæр та – Михаил Скандаровы къорды. Чысыл фæстæдæр каст фæуыдзæн Щукины номыл театралон институты режиссёры хайад. Уым та режиссёры дæсныйады сусæгдзинæдтæ базоныныл архайдзæн Римас Туманасы къорды. Уæвгæ, ацы адæймаг ын йæ дарддæры хъысмæтыл тынг сахаддзæн. Сæйраг режиссеры бынаты аккаг кæй у, уый дæр фыццаг фидарæй уый бауырныдта.
Цы равдыстытæ баццæттæ кæны, уыдонæн тыхджын къухæмдзæгъдæй саргъ кæнынц канд Вахтанговы номыл театры сценæйыл нæ, фæлæ нæ бæстæйы раззагдæр театрты сценæйыл дæр. Йæ спектакльтæ æххæст вæййынц
иугæнæг æнкъарæнтæй, театрдзауты цавæрдæр хъуыдытыл бафтауынц, уыдоны хыгъд ма сын балæвар кæны уæлмонц æнкъарæнтæ, сæ ныфсыл сын бафтауы ныфс. Цæвиттон йæ равдыстыты ссарæн ис æнусон фæрстытæн дзуӕппытӕ дæр. Лæппуйы сфæлдыстадон æнтыстыты ис цыбыр, фæлæ арф мидисджын кинонывтæ дæр. Дзырдæн зæгъæм, «Крылья», «За закрытой дверью», «Дар». Ныр бæлвырд у, куыстуарзондзинад æмæ курдиаты фæрцы къухы кӕй бафты стыр æнтысдзинæдтæ. Фæлæ уæддæр ныййарджытæ ацы хъуыддагмæ бахастой егъау æвæрæн.
Кæд тынг æнæвдæлон вæййы, уæддæр ныр дæр ма йæ зæрдыл дары аивады зын, фæлæ цымыдисаг фæндæгтыл кæимæ райдыдта цæуын, йæ фарсмæ уӕды рæстæг чи уыд, æххуыс кæмæй зоны æмæ йын зондамонæгæй чи ныллæууыд, уыдоны. Рæстæг ын куы вæййы, уæд Анатолий дæсныйадæвдисæн ахуыртимæ æрцæуы Дзæуджыхъæумæ. Сæ фæлгæты зæрдæйæ-зæрдæмæ ныхас акæны суинаг актертимæ. Фидæны стыр сценæйыл йæ курдиат ирдæй равдисын кæй фæнды, уыдонæн баххуыс кæныныл архайы.
