Ацы аз Дзæуджыхъæуы бахсæстой мин фондз сæдæ бæласы. Сезон кæронмæ æрхæццæ уыдзæн 5-æм апрелы. Ныридæгæн куыстытæ кæронмæ фæхæццæ кæнынц. Специалисттæ архайдтой цæрджытæй бынæттон администрацимæ цы курдиæттæ æрбацыд, уыдонмæ гæсгæ. Фылдæр бæлæстæ æхсæст æрцæуынц бирæуæладзыгон хæдзæртты кæртыты æмæ фæлладуадзæн зонæты. Дендрологтæ федтой алы зайæгойы уавæр дæр, æрмæст сæрмагонд хатдзæгты фæстæ лæвæрдтой бардæттæг билет.
Арæхдæр акалын фæхъæуы зæронд къалиутæ. Уæ зæрдыл уын æрлæууын кæндзыстæм, ацы къуыри аппаратон æмбырды Сергей Меняйло бахæс кодта муниципалон унитарон куыстуат “Владзеленстрой”-ы бындурыл æхсæнадон совет снысан кæнын. Уыимæ, æнæмæнг, цæрджытæм информаци хæццæ кæнын. Ныр æппæт архайдмæ кæсдзысты ноджы бæстондæрæй.
