Ацы аз Уæрæсейы социалон фонды хайад баххæст кодта рæстæгмæ æгуыстдзинады 45 мин фиддоны 385 милуан сомæн. Уыдонæй 25 мин сæххæст кодтой фæссауонмæ. Ныр сæрмагонд курдиат фыссын нæ хъæуы. Æппæт информаци райсæн ис Паддзахадон лæггæдты порталы хицæн кабинеты. Рынчындоны сыф куыстдæттæгмæ фæхæццæ кæнынц комкоммæ. Рæстæгмæ æгуыстдзинады фиддоны бæрц аразгæ у куыстæмгъуыдæй æмæ фæстаг дыууæ азы мызды рæстæмбис бæрцæй. 8 азы куыстæмгъуыдимæ фиддон уыдзæн рæстæбис мыздæн йæ 100%, 5 азы стажимæ та 60%.
Сывæллæтты æфтиæгты кой куы кæнæм, уæд 1-æм январæй фæстæмæ иумæйаг фиддонмæ бахастой фыццаг, æртыккаг æмæ ма иннæ сабиты фиддонтæ. Уый æртæ азы онг кæуыл цæуы, уыдон æмæ ма 3 азæй 7 азы онг, стӕй 8 азæй 17 онг сывæллæттæ. Куыд иннæ лæггæдтæ, афтæ йæ снысан кæнынц афæдзмæ. Йæ бæрц регионы иу сывæллонæн фæцæрынæн æппынкъадæры æхцайы бæрцы 50, 75 кæнæ 100%. Ацы аз у 12 мин 818 сомы. Фиддон цавæр хуызы снысан кæнынц, уымæн ис йæхи домæнтæ бинонты æфтиæгтæм гæсгæ. Сæрмагонд курдиат бадæттын сæ бон у ныййарджытæн, сабиты хъомылгæнджытæн кæнæ сын паддзахады раз дзуапп чи дæтты, уыдонæн. Ныффысæн æй ис Паддзахадон лæггæдты порталы, социалон фонды хайады кæнæ бирæвæрсыг центры.
