Бæлæсты хус сыфтæртæ фæззыгон адæм судзын райдайынц. Уый та гæнæн ис æмæ расайа зынгзирвæстмæ. Уыимæ ма, дохтыртæ зæгъынц, æнæниздзинадæн сыфтæрты фæздæг хæссы зиан. Æвзæрырдæм ахады æрдзыл дæр. Бæлвырддæр хабæрттæ нæ дарддæры æрмæджы.
Фæззæджы бæлæсты сыфтæртæ сæ хуыз ивын райдайынц. Сбур вæййынц, стæй та згъæлын райдайынц. Æзгъæлд фæззыгон сыфтæр свæййы риссаг фарста. Æрвылбон коммуналон службæтæ æфснайынц фæндæгтæ æмæ тротуартæ. Фæлæ уый фаг нæу. Хæдзæртты кæртыты сæ адæм сæхæдæг æфснайынц. Хатгай сыгъдæгдзинады зиутæ дæр саразынц. Сыфтæртæ та басудзынц. Дохтыртæ фидарæй зæгъынц, афтæ гæнæн нæй. Сыфтæрты фæздæг, улæфæн оргæнты низтæ кæмæ ис, уыдонæн стыр зиан хæссы.
Уыцы хъуыдыйыл хæст сты экологийы министрады. Фæздæг æвзæрырдæм ахады канд адæмыл нæ, фæлæ æрдзыл дæр. Сыфтæрты сæмбырд вæййы рыг æмæ хæдтулгæтæй цæугæ буаргъæдтæ. Иу тоннæ сыфтæ куы басудзынц, уæд атмосферæйы баззайы 9 килограммы бæрц зианхæссæг буаргъæдтæ.
Хус кæрдæг æмæ сыфтæртæ судзын тæссаг у зынгсирвæзтæй. Ацы аз æнæнхъæлæджы уавæрты министрады специалисттæ ахуыссын кодтой 900 зынгсирвæзты.
Сыфтæ чи судзы, уыдоны æфхæрынц административон æгъдауæй. 2 кæнæ 3 мин сомы бæрц ивар кæнынц хуымæтæг адæмы. 6 мин сомæй 15 мин сомы онг – хæсадон кусджытæ, юридикон куыстуæттæ та – 100 мин сомæй 200 мин сомы бæрц.
Хуасдзауты Алинæ, Дзапарты Георгий, Суанты Алан, Ирыстоны хабæрттæ.
