Æппæтæй æрыгондæр бæрæгбон. Уæрæсейы фыццаг хатт сбæрæг кодтой бархионты бон. Кадджын мадзæлттæ арæзт æрцыдысты нæ республикæйы дæр. Ирыстоны ис 3 мин бархионы бæрц. Фæсивæд сты алыхуызон организацитæй. Бæрæгбоны æрыгæтты æрæмбырд кодтой фæсивæдон центр «Фыранчы». Æрныхас кодтой сæ куыстыл, снысан кодтой фидæны пълантæ. Уый тыххæй нын бæстондæр радзурдзæн Гуыбаты Людæ.
Рæмонты Элинæ бархион хæрз æрæджы сси. Сæрды уыди фæсивæдон лагеры. Архайдта сæрмагонд ахуырты æмæ тренингты. Йæ алыварс чи уыди, уыдонмæ кæсгæйæ сцыбæл бархионы куыст кæнынмæ. Куыртатты комы цы æмбырд уыди, уый йæм кæсы тынг ахсджиаг цау. Куыд радзырдта, афтæмæй дзы фæфылдæр кодта йæ фæлтæрддзинад.
Тынг бирæ фæсивæд ис ацы бынаты. Кæрæдзийы базыдтам, хистæртæ дæр нын бирæ цыдæртæ радзырдтой. Уыдон нæ мæт кæнынц, цæмæй фæсивæд размæ тындзой, æмæ сын фæндæгтæ гом уой.
Нæ республикæйы ахæм æмбырд фыццаг хатт сарæзтой. Уыдысты дзы, афæдзы дæргъы йæ куысты æнтыстдзинæдтæ чи равдыста, уыцы цæхæрцæст фæсивæд. Сарæзтой сын ахуырадон программæ. Радзырдтой сын, бархионты змæлдты куыст куыд фæахадгæдæр кæнæн ис, уый тыххæй. Æмбырдаразджыты хъуыдымæ гæсгæ, нæ республикæйы бархионты змæлд кæны хъомысджындæр. Иу фæзы æрæмбырд сты æппæт районты минæвæрттæ дæр.
Равдисдзыстæм сын куыд хъæуы кусын уыцы змæлды. Куыд хъæуы адæмимæ куысын. Нæ хæсыл нымайæм уый, иу змæлд кæй скæнын хъæуы. Дзырд радтам, цæмæй иу къордæй кусæм, æмæ Ирыстонæн пайда æрхæссæм.
Бæрæгбоны кæрон фæсивæдæн бацамыдтой, проекттæ куыд аразын хъæуы, уый. Радзырдтой сын, сæ программæтæ сæ бон царды рауадзæн куыд уыдзæн, уый тыххæй дæр.
