Бæстыхайы спортсментæн уыдзæн алыхуызон ерыстæм сæхи хуыздæр цæттæ кæныны фадат. Ног азы спортсментæ сæхи цæттæ кæндзысты Уæрæсейы Кубок рамбулыныл ерыстæм. Уыимæ спортивон залы дуæрттæ гом сты æппæт кары адæмæн дæр. Кæй хъæппæрисæй арæзт æрцыд æмæ ма дзы цавæр ног фадæттæ ис?
Цалцæггæн куыстытæ фесты. Дзæуджыхъæуы 40-æм скъолайы байгом кодтой спортивон зал. Фехтованийыл дзы ахуыр кæндзысты, йе `нæниздзинад хъыгдард кæмæн у, ахæм адæмы. Йæ байгом кæныны мадзалы архайдта нæ республикæйы хицауады сæрдар Тъускъаты Таймураз.
«Арфæ кæнын, ацы ног бæстыхай, кæмæн байгом, уыдонæн. Мæнмæ гæсгæ, ам алы адæймагæн дæр фадат уыдзæн спортæй архайынæн, æмæ дзы сæххæст уыдзысты бирæты бæллицтæ», – загъта РСО-Аланийы хицауады сæрдар
Тъускъаты Таймураз.
Скъолайæн бындур æвæрд æрцыд 1981 азы. Уæд дзы байгом фехтованийы кълас дæр. Фыццаг тренертæ уыдысты Гæлуаты Валерий, Уырысбиты Тæтæлхан æмæ Зоя Капустина.
«Тынг хорз уаид, æмæ Ирыстоны паралимпаг спортсментæн ахæм залтæ фылдæр куы гом кæниккой, уæд», – бахахх кодта Цæллагты Жаннæ.
Ног азы спортсментæ сæхи цæттæ кæндзысты Уæрæсейы Кубок рамбулыныл ерыстæм, стæй Уæрæсейы чемпионатмæ. Спортсменты ма фæнды Канадæмæ ацæуын дæр. Ерыстæ сараздзысты нæ республикæйы физкультурæ æмæ спорты министрады хъæппæрисæй.
Спортивон залы сæйраг тренер йæ зæрдæ дары ног æнтыстдзинæдтыл. Ам рахъомыл бирæ уæлахиздзаутæ: Фардзинты Алан, Текъаты Линдæ, Къæбысты æфсымæртæ æмæ бирæ æндæртæ.
Ацы ног бæстыхайы спортсментæн уыдзæн алыхуызон ерыстæм сæхи хуыздæр бацæттæ кæныны фадат. Спортивон залы дуæрттæ гом сты æппæт кары адæмæн дæр.
Зал байгом федералон программæмæ гæсгæ. Нæ республикæйы сæргълæууæг та сæм фæкасти спортивон кусæнгæрзтæй.
Пелиты Сабинæ
