1-æм сентябры райсом Беслæны традицимæ гæсгæ райдыдта литургийӕ. Ам кувынц, 22 азы размӕ йӕ цард кӕмӕн аскъуыд, уыдоны номыл. Трагедийы бынатмӕ адӕм цӕуынц ӕнӕкӕрон халæй, хӕссынц хъазӕнтӕ ӕмӕ дон, уый уӕлдай тынгдӕр нӕ фаг кодта амынӕты уæвæг адæмæн. Саударӕн мадзалы Цӕгат Ирыстоны разамынд дӕр. Республикӕйы сӕргълӕууӕг Сергей Меняйло дидинджытæ сæвæрдта спортзалы аргъауыны дзуарыл.
Бынаты, фыдбæллæхы чи уыд, уыдон дæр. Æрвылаз сентябрь здахы ивгъуыдмæ, зæгъы, Лохаты Фатимӕ. 22 азы размӕ скъолайы фӕмард йӕ хӕрӕфырт. Уӕдӕй фӕстӕмӕ саударӕн бонты ӕнӕсцухӕй ӕрбацӕуы спортивон залмӕ мыдадзын цырӕгътӕ ссудзынмӕ ӕмӕ, сӕхимӕ чи нал ӕрбаздӕхт, уыдоны ном ссарынмӕ.
Чи нал ис, уыдоны ном хъуыды кæнынц Беслæнæй дарддæр дæр. Абон ардӕм цӕуынц политиктӕ, ӕхсӕнадон архайджытӕ ӕмӕ фӕсивӕд ӕппӕт бӕстӕ ӕмӕ дунейӕ. Се ‘ппӕт дӕр сӕхицӕн хӕсыл банымадтой трагедийы бынат бабæрæг кæнын æмæ, ам йæ хиуӕтты чи фесæфта, уыдонæн сӕ рис райсын.
Бирæ фӕсарӕйнаг уазджытӕ трагеди сæ зæрдæмæ хæстæг рагæй айстой. Ардӕм фыццаг хатт не ‘рцыдысты, амæттæгты хӕстӕджыты фарсмæ балæууынц ӕмӕ та иннæ аз дӕр ногӕй ӕрыздӕхынц трагедийы бынатмӕ. Уыдонимӕ — Беслӕны кадджын гражданин Мауро Мурджа дæр. Куыд зæгъы, афтæмæй Италийы цӕрджытӕ уыцы рис сӕхи рисыл нымайынц.
Æртӕ боны “Мысæн Вахтæ” ацӕудзӕн традицион хуызы. Метрономы зӕлтӕм ногӕй бакӕсдзысты 334 номы, ӕрдӕгхӕлд спортзалы ссудздзысты мыдадзын цырӕгътӕ. Адӕм та скъолайы кæртмæ цӕудзысты, цӕмӕй ма ноджы иу хатт сӕ зӕрдыл ӕрлӕууын кӕной, Беслӕнӕй нӕ ферох сты ӕмӕ никуы ферох уыдзысты, 22 азы размӕ чи фӕхъуыд, уыдон.
