Продукцийы мингай тоннæтæ æмæ дæсны кусджыты къорд. Беслæны скуыста кæсаг æмæ стурвосæн сур холладжы кондады завод. Инвестицион проект æххæст кæны компани «РусМодус-Фид». Ныридæгæн балхæдтой хъæугæ кусæнгарз æмæ сног кодтой сæ рауагъд. Ног гæнæнты хъомыс егъау у. Завод бабæрæг кодта республикæйы сæргълæууæг Сергей Меняйло.
Ацы завод у регионы раззагæртæй иу. Афæдзмæ цы продукци рауадзынц, уый бæрц у 200 мин тоннæйы. Æмæ уыцы бæрцуат, куыстуаты разамынды ныхæстæм гæсгæ, дарддæр кæндзæн æрмæст фылдæр.
Куыстуаты ахсджиагдæр бынат – лаборатори. Ам цæстдард ис кондады æппæт къæпхæнтæм дæр. Сæйрагдæр у хæрзхъæддзинад. Уæдæ æппæт бæрæггæнæнтæ та компьютер фæнысан кæны йæхæдæг.
Кæсаг æмæ стурвосæн сур холлаг куыд уадзынц, уый Сергей Меняйлойæн равдыстой бæстонæй, алы къæпхæн дæр хицæнæй. Сæргълæууæг схызти заводы æппæт уæладзгуытæм, æрзылд йæ фæзуатыл, федта æмæ аргъ скодта хидæгмæ иунæг ифтонггæрзтæн.
Холлæгтæ уадзæн завод скуыста инвестицион проекты руаджы. Æххуыс уыдзæн Уæрæсейы хъæууон хæдзарады райрæзтæн дæр. Эксперттæ куыд зæгъынц, афтæмæй фæсарæйнаг холлæгты бæсты нæхимæ уагъд продукцийæ пайдагæнæн уыдзæн.
Ныртæккæ, фыццаг къæпхæныл, куыстуаты хъомыс у – 250 тоннæйы кæсаджы, 300 тоннæйы стурвосы холлаг. Абон уал заводы кусы 100 адæймаджы. Æппæт дæр ацыдысты сæрмагонд ахуыртæ æмæ нырыккон технологитæй пайда кæнынц æнтыстджынæй.
