Скъоламæ цингæнгæйæ чи цыд, уыдон рæстæгмæ зындонмæ бахаудысты. Нырма сабитæ, бирæ бæллицтæ кæмæ ис, уыцы æрыгæттæ. Теракт арф фæд ныууагъта, чи фервæзт æмæ скъолайы къæсæрæй афтæ дæр чи нал рахызт, уыдоны бинонты зæрдæты се`ппæты дæр. Уыцы æвирхъау цауты æвдисæнтæй иу – Кокуаты Кристинæ. Уæд ыл цыд 10 азы. Скъолайы бæрæгбонмæ араст йæ мад æмæ йæ хо Лианæимæ. Кристинæйæн йæ кæстæр хойы мæлæт йæ къухтæй атыдта.
Кокуаты Кристинæ райгуырд Хуымæллæджы. 5-æм къласы онг ахуыр дæр уым кодта. Фæлæ 2004-æм азы йæ бинонтæ ралыгъдысты Беслæнмæ. Фыд, мад æмæ се ‘ртæ чызджы æрцардысты Коминтерны уынджы. Сæ ног хæдзармæ æппæтæй хæстæгдæр уыд 1-æм скъола. 1-æм сентябры Кокуаты Кристинæ æмæ йæ хо Лианæ сæ мадимæ хъӕлдзӕгӕй араст сты скъоламӕ.
Фæлæ Зонындзинæдты боны циндзинад ахаста æрмæст 15 минуты. Кристинæйыл 10 азы цыд, фæлæ фыдбоны рæстæгæн йæ алы минут дæр хъуыды кæны.
Скъолайы спортивон залмæ куы бахауд чысыл Кристинæ, уæд хъуыды дæр нæ кодта, ацы ас лæгтæ фыдракæнд кæй кæнынц, уый. Бæстыхайы сулæфæн дæр нæ уыд, дойныйæ марди. Хуыцау хорз, йæ мад æмæ йæ хойы ссардта. Кӕрӕдзиуыл хæцыдысты.
Хъæр æм кодтой, фæлæ йæм зынгæ дæр ницы кодта. Æмбаргæ дæр ницыуал кодта. Нæдæр æм тас уыди, нæдæр рис хъардта. Æрмæст æй хъуыди дон. Йæхимæ куы ‘рцыди, уæд уыдис рынчындоны. Уым уыдысты йæ хо æмæ йæ мад дæр. Кристинæ палатæйы хуысгæйæ дуар хъахъхъæдта, йæ бинонтæй йæм исчи кæд æрбахиздзæн, зæгъгæ.
Кристинæ ‘нхъæлмæ касти, йæ хо Лианæимæ кæд сæмбæлдзæн, уымæ дæр. Фæлæ йæ уыцы фæнд никуыуал сæххæст уыдзæн. Уæд, фыццæгæм сентябры, сæ гыццыл хойы семæ кæй нæ ракодтой, уый абон дæр чызг хъысмæты ахсджиаг лæварыл нымайы.
Беслæны амæттæгтæ кæм ныгæд сты, уырдæм, Зæдты Сахармæ, Кристинæ алы аз дæр æрбацæуы. Дидинджытæ æрæвæры уазал дурыл. Къамæй йæм мидбылхудгæ кæсы Лианæ. Йæ хъарм къухтæ йын йæ хистæр хо ныр дæр ма хъуыды кæны. 17 азы размæ цард дыууӕ дихы фæци – уыцы боны размӕ ӕмӕ йæ фӕстӕ.
Кокуаты Кристинæйыл ныртæккæ 28 азы цæуы. Азæй азмæ йæ зæрдæ тынгдæр дзыназы. Ацы æвирхъау цаутæ арф фæд ныууагътой чызджы зæрдæйы. Рæстæг цæуы, Кристинæ æмæ Беслæны скъолайы иннæ ахст сывæллæтты дарддæр цæрын хъæуы. Фæлæ 1 сентябрь Ирыстонӕн Зонындзинӕдты бон никуыуал суыдзӕн, сентябры фыццаг ӕртӕ боны ӕнустӕм дӕр баззайдзысты мысӕн бонтӕй.
