Хъæдæрмæгимæ кусын, уæлæдарæс хуыйын, зæххы куыст кæнын, суанг ма кинонывтæ исын. Æппæт ацы хъуыддæгтыл ахуыр кæнынц Дур-дуры скъола-интернаты хъомылгæнинæгты. Алы дæсныйадæн дæр – йæхи æрмадз. Ахуыры азы райдиан сæ кадджын уавæры байгом кодтой. Мадзал бабæрæг кодта республикæйы ахуырад æмæ наукæйы министры хæстæ рæстæгмæ æххæстгæнæг Алыбегты Эллæ. Ног гæнæнтæ фæзынд федералон проект «Нырыккон скъола»-йы фæлгæты. Сывæллæттæ алыхуызон дæсныйæдты сæхи куыд фæлварынц, уый тыххæй радзырдтой ме ‘мкусджытæн.
Годжыцаты Мурат ахуыр кæны 6-æм къласы. Уарзы зæххы куыст кæнын. Скъола-интернаты цы ног хъæрмуат фæзынд, ууыл дæр иннæтæй тынгдæр, уый тыххæй цин кæны. Куы йæ сарæзтой, уæдæй фæстæмæ дзы вæййы æрвылбон. Цы нæ халсар дзы æрзайын кодта, ахæм нал баззад. Нуры, цæхæра. Ацы аз та æрæмбырд кодтой джитъри æмæ пъæмидоры тыллæг дæр.
Хъæрмуат дзуапп дæтты æппæт нырыккон домæнтæн. Сарæзтой йæ федералон проект «Нырыккон скъола»-йы фæлгæты. Æмæ æрмæст хъæрмуат нæ. Æдæппæтæй ам ис 10 ног æрмадзы. Зæгъæм, хъæды куыст æмæ къахдарæс кæныны æрмадзтæ. Кондады гæрзты фæрцы къахдарæс цалцæг нæ, фæлæ ма дзы ног дзабыртæ бахуыйæн дæр ис. Уымæй уæлдай ма, нырыккон технологиты руаджы байгом уыдзысты робототехникæ, анимацион, къамтæ æмæ кинонывтæ исæн æрмадзтæ.
Ног кусæнгæрзтæ фæзынд хуыйджыты æрмадзы дæр. Цы чызджытæ дзы архайынц, уыдон ног ахуыры азы æрбаддзысты нырыккон кусæнгæрзты уæлхъус. Ног машинæтæ кæнынц куыд хуыйгæ, афтæ бийгæ дæр.
Интернаты хъомылгæнинæгтæн се ‘нæниздзинад у хъыгдæрд. Æмæ уымæ гæсгæ ахуыргæджытæ удуæлдайæ архайынц, цæмæй сæ исты куыстыл фæцалх кæной. Царды сын уæд æнцондæр уыдзæн, зæгъгæ. Уымæн æххуыс у национ программæтæ дæр. Ацы аз бацархайдтой проект «Доброшкола»-йы дæр. Уый фæрцы скъолайы инклюзивон ахуырадæн ноджы фылдæр гæнæтæ фæзынд.
Интернаты ис 59 хъомылгæнинаджы, уыдонæй цалдæр хъомыл кæнынц æнæ ныйарджытæй. Æппынæдзух вæййынц ам. Сывæллæттæ ног гæнæнтæм зæрдиагæй æнхъæлмæ кæсынц. Сæ фæрцы скъола каст фæуыны агъоммæ сæхицæн равзардзысты фидæны дæсныйад.
