Информацион ног тыгъдад саразын, егъау компаниты киберæдасдзинадыл æппынæдзух кусын, æнтыстджынæй къабазы райрæзтыл архайын. Абон Уæрæсейы бæрæг кæнынц программисты бон. Бæрæгбонæн амынд рæстæг нæй, уымæ гæсгæ йæ фæбæрæг кæнынц афæдзы 256-æм бон. Ацы нымæц хуымæтæджы æвзæрст не ‘рцыд. Астифтыгъдæг байты руаджы ис уал нымæцы равдисӕн. Бæстон нымæцтæ æгæрон уарзтæй чи уарзы æмæ абоны бон сæ дæсныйад хъæугæ кæмæн у, уыцы специалистты тыххæй нæ дарддæры æрмæг.
Ныртæккæ командæ ног хъуыдыйыл кусы. Арæхдæр æваст фæзыны. Фыццаджыдæр уал – бæстон ныхас. Фæстæдæр – хæстæ кæрæдзийы ‘хсæн адих кæнын. Уыдон та гыццыл не сты. Дизайн, бакуыстад, графикæ, хъомыс. Ног уæлæфтуанæй архайгæйæ адæймаг хъуыды дæр нæ акæны йæ саразынӕн цас хъару æмæ зонындзинæдтæ бахъæуы, уый. Æрыгон программистты æппæты ногдæр уæлæфтуан у “Трек”, зæгъгæ. Туристты нымæц куыд рæзы, афтæ парахатдæр кæны. Мадзаларазджытæ куыд зæгъынц, афтæмæй арæх бынæттон цæрджытæн сæ бон цымыдисаг фæлладуадзæн бынат бацамонын нæ вæййы. “Трек” та сын равдисдзæн æмæ радзурдзæн хуыздæр уагдонты тыххæй, базонгæ сæ кæндзæн мыггæгты мæсгуытимæ æмæ сæ равзæрды историимæ. Проекты райрæзтыл кусын райдыдтой афæдз размæ. Æнцон нæ уыд. Техникон æууæлтæй уæлдай ма базонын хъуыд бирæ информаци, цӕмӕй кæронбæттæны продукт уа ӕххӕст цæттæ. Ныртæккæ дæр æрыгон адæм дарддæр йæ райрæзтыл архайынц. Ногддзинæдты руаджы фылдæр кæнынц йæ пайдагæнджытӕ дæр. Аразджытæ бæстонæй кæсынц æппæт фиппаинæгтæм. Уайтагъд сæ аиуварс кæнынц.
Æгæрон гæнæнтæ. Уый тыххæй специалисттæ стыр аргъ кæнынц сæ дæсныйадæн. IT къабазы кусджытæн сæ бон у экономикæйы алы къабазы дæр куыст фæткмæ гæсгæ снысан кæнын, саразын, баивын, архайд сног кæнын. Уый тыххæй сты хъæугæ, агурынц сæ алы куыстуаты дæр.
Æрыгон специалисттæн хорз æххуыс кæны паддзахад дæр. Льготæимæ кредиттæ, æфсады службæйæ фæсæмгъуыд æмæ æндæр лæггæдтæ. Ахæм æххуыс къабазы кад æнæмæнг бæрзонддæр кæнынц. Уæдæ дунейы алы къумæй фæссауонмæ кусыны фадат кæй ис, уый та уæлдай раппæлинаг у. Æнтыстджын архайды тыххæй хъæуы æрмæст ноутбук æмæ интернеты тыгъдадмæ рацæуыны фæрæз.
Гæнæнтæ фаг кæй нæ вӕййынц, уый тыххæй арæх бахъæуы цавæрдæр ногдзинадыл бакусын. Сæйрагдæр у, æрыгон специалисттæ ныртӕккӕйы нон проекттæй кæй нæ пайда кæнынц, уый. Пайдайаг, хæрзхъæд æмæ оригиналон продукт кæнгæйæ æнæмæнг ис æнтыстджын суæвын.
Программированийы сусæгдзинæдтæ базонын у алкæй бон дæр. Нæ республикæйы ис бирæ гæнæнтæ ацы къабазы рæзынæн, суанг сабийæ фæстæмæ. Зæгъæм, гимназ “Диалог”-ы кусы центр “ИТ куб”. Уым скъоладзауты бæстонæй зонгæ кæнынц ацы дæсныйадимæ. Цæгат Кавказы хæххон-металлургон институты та 10-æм æмæ 11-æм къласы ахуырдзаутæн сарæзтой курсытæ.
Курсытæ цы фæсивæд ацыдысты, уыдон æй зонынц, фидæны цавæр дæсныйад равзардзысты, уый. Ахуыргæнæндонмæ бацæугæйæ дæр сын æнцондæр вæййы. Раттын хъæуы æртæ фæлварæны: математикæ, уырыссаг æвзаг æмæ информатикæ. Хæххон металлургон институты бакалавриатмæ ис 150 бынаты. Ахуыртæ цæуынц 4 азы, уый фæстæ та практикæ. Афтæмæй, студенттæ ахуыргæнгæйæ ссарынц куыст дæр.
Ныртæккæ алы компани, алы куыстуаты дæр хъæуынц IT специалисттæ. Уыдонæй аразгæ у фидæн. Рагагъоммæ кӕй руаджы снысан кæнынц экономикæйы райрæзты æууæлтæ, ахӕм технологитæ. Уымӕй уӕлдай ма хуыздæр кæнынц цæрджыты æрвылбоны цард.
