Ныхмæлæудты рæстæг залы арæх æнтæф вæййы. Ахæм уавæрты æнцон нæу тренировкæ кæнын. Фæлæ æрмæст афтæмæй ис быхсындзинадыл бакусын, зæгъынц спортсментæ. Тхэквондойæ Уæрæсейы чемпионатмæ баззад дыууæ къуырийæ къаддæр, уымæ гæсгæ ахсджиаг у уæлдай хатт хиуыл бакусын.
Максим Добрынин ссыд Челябинскæй, Цæгат Ирыстоны фыццаг хатт ис. Къуырийы дæргъы тренировкæ кодта тхэквондойы галуаны. Уыцы рæстæгмæ аргъ скодта нæ спортсменты цæттæдзинадæн дæр. Цæуы йыл 25 азы, уыдонæй 17 балæвар кодта йæ уарзон спортæн. Куыд радзырдта, афтæмæй тренировкæты афтæ тынг бафæллайы, æмæ Дзæуджыхъæуы цымыдисаг бынæттæ дæр нæма бабæрæг кодта. Ахæм фæтк сын снысан кодта нæ республикæйы тхэквондойы федерацийы сæйраг тренер.
Ирон богæлттæ сæхи куыд цæттæ кæнынц ахсджиаг ерыстæм, уымæ йæ цæст дары спорты министр Кочиты Сослан. У тхэквондойæ Уæрæсейы æхсæз хатты чемпион. Хорз æй зоны, куыд зын вæййы цæттæгæнæн рæстæг, уый. Йæ ныхæстæм гæсгæ, тренировкæтæ цæуынц бæрзонд æмвæзадыл.
Дзæуджыхъæуы Уæрæсейы чемпионатмæ цæттæ кæнынц 70 тхэковндисты. Ханты-Мансийск, Челябинскы облæст, Кæсæг-Балхъар, Цæцæны республикæ æмæ Гуырдзыстонæй.
Бæрæг нæмæ у, уæрæсейæгты бауадздзысты æппæтадæмон ерыстæм æви нæ, уый. Фæлæ спортсментæ сты цæттæ. Чемпионат ацæудзæн 23-æй 28-æм сентябрмæ Адыгейы. Республикæйы иугонд командæйы ис 16 тхэкондисты. Цæгат Ирыстоны кад афæдзы ахсджиагдæр ерысты хъахъхъæндзысты 12 хуыздæр спортсмены.
