Алыхуызон кæфтытæ, интеллектуалон хъæзтытæ, зынаргъ лæвæрттæ. Ахæм хуызы Дзæуджыхъæуы сбæрæг кодтой чиныджы бон. Сæрибардзинады проспекты байгом бæрæгбоны армукъа «Воскресный книжный уголок», сбастой йæ ирон Нардиадæимæ. Цæгат Ирыстоны раззагдæр рауагъдадтæ равæрдтой сæ алыхуызон литературæ, се ‘хсæн Нарты кадджытæ дæр. Сæ стендтæ бацæттæ кодтой журналтæ «Дарьял», «Ирæф, «Мах Дуг», сывæллæтты журнал «Ногдзау».
Æмæ кæд рæстæг асæст уыд, уæддæр горæты сæйраг парчы раз цæрджытæ æмæ республикæйы уазджытæ æмбырд кæнын райдыдтой рагацау. Армукъа гом кæныны афон куы æрхæццæ, уæд дзы адæмæй къах бавæрæн нал уыд.
Ацы аз бæрæгбоны армукъа снысан кодтой Нарты кадджытæн. Программæ рауад хъæздыг. Иннтеллектуалон викторинæтæ, алыхуызон лæвæрттимæ, музыкалон номыртæ. Уæдæ тæрхæджытыл та алы жанрты чингуытæ. Алчидæр дзы йæхицæн ссардта зæрдæмæдзæугæ кӕсинаг.
Чиныгуарзджытæн сæ куысты фæллæйттæ равæрдтой республикæйы раззагдæр рауагъдадтæ. Тæрхæджытыл æвæрд литературон журналтæ «Дарьял», «Ирæф», «Мах дуг», сывæллæтты журнал «Ногдзау». Ам сæ бынаты уыд рафыссыны гæнæн дæр.
Мадзал сси традицион æмæ адæмæн уарзон. Йæ аразджытæ — республикæйы мыхуыр æмæ дзыллон коммуникациты хъуыддæгты фæдыл комитет.
Армукъайы сæйраг нысан у фæсивæды æргом чиныгмæ аздахын, литературæмæ уарзондзинад рӕзын кӕнын.
