Дæллаг Санибайы цæрджыты тыхсын кæны сывæллæтты рæвдауæндон сæм кæй нæй, уый. Скъолайы агъоммæ кары сабиты нымæц ныридæгæн сæдæйы сæрты ахызт. Æрвылбон ныййарджытæ сæ цот ласынц Дзæуджыхъæумæ. Уый бирæты зæрдæмæ нæ цæуы. Не `сфæлдыстадон къорд балæууыд Санибайы æмæ базыдта хъуыддагыл сахадын исчи хъавы æви нæ, уый? Бакæсут ме `мкусджыты ист æрмæгмæ.
Елойты Натийæйæн ис 5 сывæллоны. Дыууæ дзы сты скъолайы агъоммæ кары. Бинонтæ сты æнгом: хæдзары куыстыты кæрæдзийæн æххуыс кæнынц. Хистæртæ кæсынц кæстæртæм. Ис дзæм райхалинаг фарстатæ дæр. Фадат сын нæй скъолайы агъоммæ ахуырадон программæ райсын. Æхсæнадон транспорты бинонтæн зын у сывæллæтты Дзæуджыхъæуы рæвдауæндонмæ ласын.
Елойты бинонтæ Дæллаг Санибайы иунæг ахæм бинонтæ не сты. Рæвдауæндон хъæуы кæй нæй, уый тыхсын кæны бирæ цæрджыты. Хъæуы хицау Хынцæгты Федоры ныхæстæм гæсгæ хъæу стырæй стырдæр кæны. Скъолайы агъоммæ кары сабиты нымæц сæдæйы сæрты ахызт.
Райхалинаг фарстаимæ зонгæ сты Æппæтуæрæсеон адæмон фронты уæнгтæ дæр. Регионалон хайады æмсæрдар Гæлиты Клим зæгъы: хъуыддагыл бакусын хъæуы тагъд рæстæджы æмгъуыдмæ.
Рæвдауæндоны хъуыддаг Дæллаг Санибайы кæд банывыл кæндзысты, уый тыххæй æрфарстам Горæтгæрон районы администрацийы сæргълæууæг Еситы Русланы. Телефонæй нын радзырдта районы уый тыххæй цы куыст цæуы æмæ хæстæгдæр рæстæг уавæр куыд аивдзæн уый тыххæй.
Уымæ гæсгæ хъæуы цæрджыты ныфс ис хæстæгдæр рæстæг сывæллæттæн фадат кæй уыдзæн ног рæвдауæндоны къæсæры сæрты бахизын уый.
