4 октябры бæрæг кæнынц сырдты хъахъхъæныны Æппæтдунеон бон. Нæ дарддæры æрмæджы хъайтар – зоолог Дзуццаты Зауырбег. Нæлгоймаг йæ хæдзары байгом кодта сырдтæ дзæбæхгæнæн центр. Уый руаджы йæ бон у фылдæр цæрæгойтæн баххуыс кæнын. Бирæтæ Зауырбеджы хонынц «Доктор Айболит». Уæвгæ, дзурынæй иу-хатт фенын хуыздæр у. Сырдтыл куыд ауды уымæ бакæсæм.
Дзуццаты Зауырбеджы Дæллаг Санибайы диссаджы дæсны дохтырыл хуымæтæджы нæ нымайынц. Адæм æм æххуысмæ арæх бахатынц, цæф сырды куы ссарынц, уæд. Йæ сырддоны суанг сыхаг регионтæ Дагестан æмæ Кæсæг-Балхъарæй ласт сырдтæ дæр ис. Уыимæ, лæвар ын кæй бакодтой, ахæмтæ. Йæ фыццаг хъомылгæнинаг уыд сæлавыры мыггагæй сырд Гришæ. Уый йæ къухтæм куы бахауд, уæд æм фæзынд сырдтæн реабилитацион центр байгом кæныны фæнд.
Зауырбег ацы хъуыддагыл архайын куы райдыдта, уæд йæ фарсмæ æрбалæууыдысты, йæхи хуызæн сырдтыл æнувыд чи у, ахæм адæм. Арæх цæрæгойты фенынмæ æрбацæуынц уазджытæ дæр, æмæ афтид къухæй нæ. Лæппуйæн æххуыс кæнынц дуканиты кусджытæ дæр. Сырдтæ уарзынц дзидза, æхсæртæ æмæ дыргътæ.
Зауырбеджы ныхæстæм гæсгæ, йæ куысты мидæг зонындзинæдтæ ахсджиаг сты. Ныртæккæ Цæгат Ирыстоны паддзахадон фæдзæхст бынаты кусæгæн йæм ис халон, æхсæрæг, поссумтæ, хæдзарон тæрхъустæ, енотæнгæс куыйтæ. Бæрæг фылдæр уыдысты, фæлæ сæ чи фæдзæбæх вæййы, уыдоны æрдзон уавæртæм рауадзы. Сырдтæм уарзондзинад Зауырбегмæ уыд йæ гыццылæй нырмæ. Зоолог суæвын та йæ æстæм къласы бафæндыд. Уæд тынг цымыдисæй каст Дроздов æмæ Затевахины равдыстытæм.
Зауырбег йæ куыстыл у æнувыд. Ис æм фидæнмæ бæллицтæ дæр. Фæнды йæ реабилитацион центры арæнтæ фæуæрæхдæр кæнын. Афтæмæй йын фылдæр гæнæтæ фæзындзæн сырдтæм фæкæсын æмæ сыл баузæлынмæ. Зæрдæ дары, фидæны уый дæр йæ къухы кæй бафтдзæн.
