Абон æппæт дунейы дæр бæрæг кæнынц Ахуыргæнæджы бон. Цæгат Ирыстоны педагогтæн сæ профессионалон бæрæгбоны фæдыл раарфæ кодта республикæйы сæргълæууæг Сергей Меняйло.
«Уæ удуæлдай фæллойæн аккаг аргъ скæнын зын у. Сымах хъомыл кæнут нæ сабиты, лæвар сын кæнут зонындзинæдтæ, зонгæ сæ кæнут сæ алыварс дунеимæ, зæрдæты гуырын кæнут хæрзæгъдау уæвыны æнкъарæнтæ. Алчидæр нæ йæ зæрдыл дары, куырыхон зонд, æцæг культурæ æмæ адæймаджы хуыздæр миниуджыты дæнцæг чи сты, уыцы ахуыргæнджыты. Кæд рæстæг царды домæнтæ ивы, уæддæр уæ куыст кæддæриддæр у ацы миниуджыты бындурыл. Æмæ уый æхсызгон у.
Цæгат Ирыстоны ахуыргæнджыты корпус кæддæриддæр уыд æмæ абон дæр у нæ сæрыстырдзинад. Республикæйы педагогтæ æппынæдзух æмæ æнтыстджынæй архайынц æппæтуæрæсеон æмæ æппæтдунеон конкурсты. Фидар кæнынц сæ дæсныдзинад, æмвæзад æмæ курдиат. Сæ æнтыстытæ æмæ сфæлдыстадон гæнæнтæм кæсгæйæ та фидарæй зæгъæн ис, æмæ ахуырады системæйы райрæзт зæрдæхсаинаг нæу.
Республикæ æппæт ахуыргæнджытæн æмæ педагогон фæллойы ветерантæн мæ зæрдæ зæгъы фидар æнæниздзинад, сабырдзинад, ног профессионалон бæрзæндтæ æмæ стыр амонд!» — загъта Сергей Меняйло.
