Дзӕуджыхъӕуы 28-æм скъолайы уыд коучинг-сесси æрыгон филолгтæн

Дзӕуджыхъӕуы дыууын æстæм скъолайы æрдзырдтой мадӕлон ӕвзаг амоныны ног методикӕтыл. Коучинг-сесси ӕрыгон ахуыргӕнджытӕн ӕмӕ ирон филологийы факультеты хистӕр курсыты студенттӕн сарӕзта Ирон ӕвзаджы рӕзты центр, унверситетимӕ иумӕ. Фӕлтӕрдджын ахуыргӕнджытӕ — тренерты ролы, архайджытӕ уайтагъд практикӕмæ рахызтысты. Студенттӕ сӕхи методикон проекттӕ равдыстой се ‘мгæрттæ æмæ зондамонджытӕн. Командӕтæ кодтой, зæгъæм, социалон хызты фыссæджы сæрмагонд фарсы проекттæ, арӕзтой интеллект-картӕтӕ ӕмӕ уроктӕм ӕфтыдтой компьютерон хъӕзтытӕ ирон ӕвзагыл. Уӕлдай ӕргом аздӕхтой кроссенс-технологимӕ — уый æххуыс у логикӕ ӕмӕ ныхасы рӕзтӕн. Мадзаларазджыты ныхӕстӕм гӕсгӕ, иумӕйаг куыст хорзырдæм ахады профессионалон арӕхстдзинад фӕбӕрзонддӕр кӕныныл. Ныр ногдзинæдтæй ахуыргӕнджытӕ спайда кæндзысты кълæсты. Æппæт дæр фӕнысан кодтой, ахӕм мадзæлтты фæрцы уроктӕн сæ бон кæй у нырыккон ӕмӕ сывæллæттæн цымыдисаг суӕвын. Фембӕлд у Ирон ӕвзаг ӕмӕ литературӕйы бон бӕрӕг кӕныны фыццаг мадзал.