Ныртӕккӕ ардыгæй сывӕллӕтты хъæлæсты бӕсты хъуысы арӕзтадон мигæнæнты уынӕр. 75-ӕм рӕвдауӕндоны дыууӕ къорды цӕуы бындурон цалцӕг. Ног кæнынц инженерон коммуникацитӕ: ивынц телтӕ, сантехникæ, рудзгуытӕ ӕмӕ дуӕрттӕ. Уый фæстæ та агъуыстыты бакæндзысты аивгæнæн куыстытæ.
Сывӕллӕтты рӕвдауӕндон “Ромашка” кусы 50 азӕй фылдӕр — 1973-æм азӕй фӕстӕмӕ. Цӕуынц ӕм 300 сабийы. Ахæм ном ыл сæвæрдтой бæстыхайы ӕнахуыр пъланы фӕрцы: алы къордӕн дӕр ис хицӕн рацӕуӕн тезгъогӕнӕн фӕзмӕ. Ӕнусы ӕмбис чысыл æмгъуыд нæу. 1973-æм азæй нырмæ иуæй- иу агъуыстытӕ заууатмæ æрцыдысты. Уӕлдай хъусдард — инженерон системӕтӕм. Уыдоны хӕрзхъӕддзинадӕй аразгӕ у хъомылгӕнинӕгты ӕдасдзинад ӕмӕ удӕнцой.
Цалцӕгмæ цӕст дарынц Дзӕуджыхъӕуы минӕвӕртты æмбырды депутаттӕ горӕты администрацийы специалисттимӕ иумӕ. Ӕркасты рӕстӕг сбӕрӕг кодтой, ноджы ма дыууӕ къордмæ базилын кæй хъӕуы, уый. Уыдонӕн дæр бацӕттӕ кӕндзысты проектон-хыгъдон документаци ӕмӕ банымайдзысты хъæугæ æхцайы бӕрц. Рæвдауæндоны разамонæджы ныхӕстӕм гӕсгӕ, ахӕм ӕххуысмӕ ам рагӕй ӕнхъӕлмӕ кастысты.
75-ӕм рæвдауæндон сног кӕнын у горӕты комплексон программӕйы иу хай. Афӕдзы размӕ Дзӕуджыхъӕуы минӕвӕртты æмбырды депутатты хъӕппӕрисӕй сарӕзтой кусӕг къорд. Специалисттӕ федтой ӕппӕт бæстыхæйттæ ӕмӕ сбӕрӕг кодтой, æвæстиатæй кæцы кусæндæттæм хъæуы базилын, уый. Афӕдз нæ рацыд, афтæ ног уддзæф бауагътой 15 рӕвдауӕндоны. Хъæугæ фæрæзтæ сты муниципалон бюджетæй.
Хъомылгӕнинӕгтæ уал цæуынцы ӕндӕр къордтæм. Цалцæджы ӕппӕт къӕпхӕнтӕ фӕуынмӕ хъавынц сентябры кӕронмӕ Уый фӕстӕ ног — рухс, ӕдас, хӕрзвадат агъуыстытæ — ногӕй байдзаг уыдзысты сывӕллӕтты хъӕлӕстӕй.
