Илаты Æхсæртæджы бинонтæн математикæ хуымæтæг предмет нæу. Бæлвырд наукæтæм цымыдисдзинад æвдисынц йæ хистæр æфсымæр æмæ хо дæр. Лæппумæ та уыцы курдиат фæзынд 3-аг къласы куы ахуыр кодта, уæд. Раздæр уал алыхуызон фæлварæнтæ æххæст кодта. Уый фæстæ та, конкурсты, олимпиадæты æмæ турнирты архайгæйæ арæх сси уæлахиздзау. Æхсæртæг кæд нырма 8-æм кълас фæци, уæддæр зоны — фидæны йæ цард сбæтдзæн нымæцтæ æмæ формулæтимæ. Ныр та уал цæуы сæрмагонд сæрдыгон скъоламæ.
— Ныр фӕндзӕм хатт æрбацыдтæн ардӕм. Фæнды мæ математикæ бæстондæрæй ахуыр кӕнын. Ам мӕ зӕрдӕмӕ тынг цӕуы. Æппынæдзух ӕвзарӕм цымыдисаг темӕтӕ ӕмӕ æххæст кӕнӕм вазыгджын хӕслæвæрдтæ. Ам ахуыр кӕнын тынг зын нӕу, фӕлӕ цымыдисаг.
Бæлвырд наукæты сæрдыгон скъола арæзт цæуы ныр 21-æм хатт. Уал азмæ проект ивта: йæ архайджыты нымæц дæр рæзыд, уæдæ программæ дæр фæзындæр. Ацы аз скъоламæ курдиаттæ балæвæрдтой 87 скъоладзауы, фæлæ йæм, фæлварæнты хатдзæгтæм гæсгæ райстой 42-йы. Лекцитæм цæудзысты Дзæуджыхъæуы, Мæздæджы, Алагиры, Æрыдоны скъоладзаутæ. Цæмæй дзы алчидæр райса бæлвырд зонындзинæдтæ уымæ гæсгæ хъуамæ къордтæ арæзт цæуой 11-15 адæймагæй, . Уæдæ ахуырæй дарддæр ам ис æппæт фадæттæ уæгъд рæстæг æрвитынмæ
— Ацы скъола кусы куыд цыбырӕмгъуыдон интенсив. Программӕ ахӕссы 10 боны. Уымæ гæсгæ сывӕллӕттӕн ахуыры ӕмӕ фӕллад уадзыны рæстæг дæр вæййы. Ахуыртӕ цӕуынц “Вершина”-йы бындурыл. Уый тынг ӕнцонвадат у. Уымæн æмæ центры сарæзтой хъæздыг программӕ: олимпиадӕтæ математикӕйæ, уыдонæй уæлдай, математикӕ ӕмӕ физикӕйӕ лекцитӕ.
Скъолайы ахуыргӕнинӕгтӕй бирӕтӕ рамбылдтой олимпиадӕтӕ ӕмӕ математикӕйӕ турниртӕ. Йæ программӕмӕ ма хауынц лекцитӕ физикӕ, биологи ӕмӕ информатикӕйӕ. Ам ахуыргӕнджытӕ ӕххуыс кӕнынц сывӕллӕттӕн хуымæтæг уроктӕй вазыгджын олимпиадӕйы хӕслӕвӕрдтӕм рахизынмæ. Сӕйраг хӕс — цæмæй фæсивæд æрмæст зын хæслæвæрдтæ æххæст кæнын ма сахуыр уой, фӕлӕ ма наукӕйы рӕсугъддзинад дӕр банкъарой.
— Олимпиадон хынцинӕгтӕ тынг хицӕн кӕнынц скъолайы программӕйӕ. Рӕзын кӕнынц сывӕллӕтты логикон хъуыдыкӕнынад ӕмӕ ӕххуыс сты алывӕрсыг рӕзтӕн. Куыст арӕзт цӕуы ахӕм хуызы — фыццаг ахуыргӕнджытӕ ӕмбарын кӕнынц теори. Уый фӕстӕ ахуыргӕнинӕгтӕ райсынц мыхуыргонд хӕслӕвӕрдтӕ, сæххæст сæ кæнынц ӕмӕ сӕ раттынц педагогтæм. Раст дзуаппыты тыххӕй исынц баллтӕ. Сменӕйы кӕрон мадзаларазджытæ скӕндзысты архайджыты рейтинг.
Скъоладзаутæн аразынц спортивон хъӕзтытӕ ӕмӕ бӕрӕгбӕттӕ дӕр. Уый ӕххуыс у урокты ‘хсӕн фӕллад уадзынӕн. 21 азы дӕргъы Бӕлвырд наукӕты сӕрдыгон скъола сси республикӕйы олимпиадӕтӕм цӕттӕ кӕныны сӕйраг центр. Ӕхсæртæг ӕмӕ иннӕ скъоладзаутӕн уыцы 10 боны сты ног зонындзинӕдтӕ райсын ӕмӕ ӕмбӕлттӕ ссарыны хорз фадат.
