Дзæуджыхъæуы 27-æм скъолайы ахуырдзаутæ ног ахуыры азмæ райстой æцæг лæвар. Ахуыргæнæндоны бындурыл байгом сывæллæтты технопарк «Кванториум». Ныр сывæллæттæн фадат уыдзæн ног хуызы ахуыр кæнын хими, биологи, физикæ æмæ робототехникæйы сусæгдзинæдтæ. Кадджын мадзалы уазæг — республикæйы ахуырад æмæ наукæйы министры хæстæ рæстæгмæ æххæстгæнæг Алыбегты Эллæ. Ахуырдзаутæн æмæ мадзалы архайджытæн равдыстой технопаркы гæнæнтæ.
Сырх лентæ кадджын уавæры алыг кодтой. Дзæуджыхъæуы 27 скъолайы байгом технопарк «Кванториум». Ныр ахуырдзауты бон уыдзæн сæ зонындзинæдтæ алыхуызон къабæзты фæуæрæхдæр кæнын.
«Кванториум» у техникон сфæлдыстады центр. Сабиты бон дзы у бакусын сæхи цымыдисаг проекттыл. Абонæй фæстæмæ предметтæ ахуыр кæндзысты канд чингуытæй нæ, фæлæ ма пратикæйы хуызы дæр. Уый руаджы сын фидæны дæсныйад равзарын дæр æнцондæр уыдзæн.
Ныр та уал скъоладзауты зонгæ кæнынц ног кълæстимæ. Хими æмæ биологийы кабинет ифтонг у микроскоптæ, нымæцон лаборатори æмæ æндæр нырыккон кусæнгæрзтæй. Технопаркы хъӕугӕ уавæртӕ ис технологи æмæ робототехникæ ахуыр кæнынæн дæр. Уымæн та æххуыс уыдзысты сæрмагонд принтертæ æмæ моделированийæн бӕзгӕ гæрзтæ. Сывæллæттимæ кусдзысты уæлæмхасæн ахуырады центры специалисттæ.
Сывæллæттæн «Кванториум» технопарктæ ма байгом уыдзысты республикæйы 2 скъолайы.