Дзæуджыхъæуы 3-аг хатт ацæудзæн Æппæтадæмон Кавказаг фестиваль «Мариинаг-Дзæуджыхъæу»

Дзæуджыхъæуы 3-аг хатт ацæудзæн Æппæтадæмон Кавказаг фестиваль «Мариинаг-Дзæуджыхъæу». Цæгат Ирыстоны цæрджытæн уый у ахсджиаг цау. Дзæуджыхъæуы аивадуарзджытæм æнхъæлмæ кæсы цымыдисаг æрмæг. Фестивалы фæлгæты Мариинаг театры зарæггæнджыты къорд азардзæн адæмон æмæ уырыссаг классикæйы зарджытæ. Куыд раздæр афтæ ацы хатт дæр, оркестрæн разамынд дæтдзæн Гергиты Валерий. Фестиваль райдайдзæн 28-æм сентябры, цæудзæн 6-æм октябрмæ. Оперæ æмæ балетæй уæлдай фестивалы уазджытæ фендзысты дæсныйад æвдисæг ахуыртæ дæр. Сæ курдиат дзы равдисдзысты Петр Чайковскийы номыл æппæтадæмон конкурсы лауреаттæ. Сывæллæттæн арæзт æрцæудзæн сæрмагонд программæ. Фестиваль цæудзæн Мариинаг театры Дзæуджыхъæуы филиалы æмæ Цæгат Ирыстоны паддзахадон филармонийы. Уæ зæрдыл уын æрлæууын кæндзыстæм 2017 азы, æхсæз бонмæ фестиваль æрбамбырд кодта 3 мин адæймагæй фылдæр. Архайдта дзы зындгонд пианист Денис Мацуев æмæ альтист Юрий Башмет дæр.