Республикон аивæдты колледжы уыд национ музыкалон инструменттыл цæгъдджыты ‘хсæн регионалон æркасты гала-концерт. Сарæзтой йæ Уæрæсейы сгуыхт артисткæ Мыстулаты Иринæйы номыл.
Æркасты бацархайдтой 70 æрыгон фæндырдзæгъдæджы. Алчи дæр сæ арæхстджынæй æмæ аивæй сæххæст кодта æркасты хæс. Уый фæдыл сын жюрийы уæнгтæ сæ курдиатæн стыр аргъ скодтой. Архайджытæ цагъдтой ирон фæндыр, хъисын æмæ дала фæндыртæ, балалайкæ æмæ æндæр инструменттыл.
Æркаст ныр арæзт æрцыд 4-æм хатт. Ацы аз ма дзы сæ тыхтæ бавзæрстой Хуссар Ирыстон æмæ Цæцæны республикæйæ уазджытæ дæр. Архайджытæн аргъ кодтой 3 номинацимæ гæсгæ. «Профессионалтæ», «Хæдахуыртæ» æмæ «Ансамбльтæ». Сæрмагонд Гран-при – ног фæндыр Мыстулаты бинонтæй рамбылдта Хуссар Ирыстоны минæвар Мамиаты Марик.
