Республикæйы хицауады сæрдар Дзанайты Барис бацархайдта акционерон æхсæнад ДОМ.РФ кæй аразы, уыцы рухстауæг программæ «Городские практики»-йы гом кæныны мадзалы.
Программæ æххæст кæндзысты Уæрæсейы 10 горæты. Райдыдтой уал Дзæуджыхъæуы. Сахартæ аразыны æмæ архитектурæйы къабазы раззагдæр специалисттæ ахуыр кæндзысты горæты райрæзты нырыккон фадæттыл. Мадзал арæзт æрцыд видеобастдзинады хуызы. Дзанайты Барис куыд фæбæрæг кодта, афтæмæй нæ республикæйы мастер-пълан саразыны тыххæй ДОМ.РФ-имæ бадзырд бафыстой 2022-æм азы. Йæ ныхæстæм гæсгæ, семæ æмгуыстад нæ республикæйæн у тынг ахсджиаг.
Программæ «Городские практики»-йы сæйраг нысан у Уæрæсейы горæтты райрæзты куыст хорз чи зоны, ахæм специалистты бацæттæ кæнын. У лæвар. Ахæсдзæн 1-æм апрельмæ. Ахуырты сæйраг темæ уыдзæн горæты дизайн-код. Бацархайдзысты дзы 50 бынæттон специалистмæ ввахс. Се ‘хсæн архитектортæ, проектаразджытæ, горæттæ аразджытæ, амалхъом адæм æмæ активисттæ.
