Срӕмыгъды уынæр куы айхъуыст æмæ бæзджын фæздæг куы сыстад горæты сæрмæ, уæд рæстæг уыд 12 сахат æмæ 20 минутмæ ‘ввахс. Уылæн ахæм тыхджын уыд, ӕмӕ сыхаг хӕдзӕртты рудзгуытæ батыдта. Партизанты фӕрсуынг æмæ Августы цауты уынгты тигъыл дæсгай метртыл ӕвгтӕ æмæ бетоны къæрттытæ ныппырх сты.
Бынатмæ атагъд кодтой оперативон службæтæ. 14 сахаты æмæ 34 минуты. Сæстыты бынӕй систой 1985 азы гуырд нӕлгоймаджы мард. Оперативон службæтæ фехъусын кодтой 14 хъыгдардбаййафæджы тыххæй.
14 сахаты æмæ 47 минуты. Ирвæзынгæнджытæ ссардтой дыккаг нæлгоймаджы мард. Республикӕйы прокуратурӕ сарӕзта басгӕрст. Прокуроры хӕдивӕг Николай Клёпов рацыд цауы бынатмӕ.
Ныртæккæ 13 адæймаджы сты рынчындæтты. Се ‘хсæн 2 сывæллоны, сæ иуыл цæуы 12 азы, иннæ аздзыд. Æнахъомты цардæн тæссаг нæу. 9 адӕймаджы дзӕбӕх кӕнынц Республикон клиникон рынчындоны, иу — реанимацийы. Йæ уавӕр у ӕнӕфӕцудгӕ уӕззау, фæлæ цардӕн тас нӕу. 2-йæ госпитализацигонд ӕрцыдысты Тагъд æххуысы рынчындонмæ. Сæ иу — тынг уӕззау уавӕры, дохтыртӕ тох кӕнынц йӕ цардыл.
Æдасдзинады домӕнтӕн дзуапп чи нӕ дӕтты, ӕнӕниздзинадӕн уӕззау зиан кӕнӕ мӕлӕт чи расайдта, ахӕм лӕггӕдтӕ кӕныны хъуыддаджы фӕдыл Дзӕуджыхъӕуы байгом кодтой уголовон хъуыддаг. Республикӕйы сӕргълӕууӕг Сергей Меняйлойы информацимӕ гӕсгӕ, цауы бынаты оперативон штабы куысты архайынц ӕппӕт уӕлрадон службӕтӕ, стӕй республикон разамынды минӕвӕрттӕ. Сæйрагдæр хæс регионы разамонæг схуыдта цӕрӕн хӕдзӕртты хъыгдард рудзгуытӕ ӕмӕ инженерон коммуникациты тагъддӕр сног кӕнын, цы пиротехникӕ ссардтой, уый раласын, цауы бынаты ӕппӕт системӕты комплексон басгӕрст саразын, стӕй цы зиан ӕрцыд, уый банымайын.
Сергей Меняйло куыд фӕбӕрӕг кодта, афтӕмӕй рагагъоммӕйы басгӕрсты хатдзӕгтӕм гӕсгӕ зӕгъӕн ис, Партизанты фæрсуынджы кæй уыд пиротехникӕ уадзӕн ӕнӕзакъон цех.
Æнæнхъæлæджы цауты министрады ӕмӕ коммуналон службӕты специалисттӕ дарддӕр ӕвзарынц цауы бынаты рæдзæгъдтæ. Ӕрбакодтой техникӕйы 50 иуӕгӕй фылдӕр.
