11-æм скъолайы райдыдта цалцæггæнæн куыстыты дыккаг къæпхæн. Ног корпус сараздзысты райдиан скъолайæн. Æртæуæладзыгон бæстыхайы фæзуат уыдзæн 2 мин кв метры, 250 ахуырдзауæн дзы уыдзæн 12 къласы. Специалистты ныхæстæм гæсгæ, дзуапп дæтдзæн æппæт нырыккон домæнтæн. Æдасдзинадмæ здæхынц уæлдай æргом. Ацы хайы арæзтад кæронмæ фæуыдзæн уалдзæджы.
Пъланмæ гæсгæ дарддæр цæудзæн скъолайы сæйраг корпусы арæзтад. У, культурон нысаниуæг кæмæн ис, ахæм объект. Раздзæр уыд Гоголы номыл сылгоймæгты училищæ. Байгом æй кодтой 1906-æм азы. Аразджытæ бахъахъхъæндзысты йæ историон æддаг бакаст, архитекторы хъуыды. Объекты рацарæзт цæуы сæрмагонд программæйы фæлгæты. Æдæппæтæй куыстытæн рахай кодтой 146 милуан сомæй фылдæр.
