«Яндекс-Тæлмацгæнæг» æмæ «Яндекс-Навигатор» сдзурдзысты иронау. Интеллектуалон хъæлæсон æххуысгæнæг «Зæлинæ» лæггад кæнын райдыдта республикæйы цæрджытæн. Уæвгæ ацы аз нымæцон технологиты фæрцы егъау куыст бакæндзысты ирон æвзаджы райрæзтыл.
«Яндекс-Тæлмацгæнæджы» иу фарс 2021 азы кусдзæн ирон æвзагыл. Республикæйы цæрджытæн уый фадат ратдзæн куыд ирон æвзагмæ, афтæ ма ирон æвзагæй дæр тæлмац кæнынæн дунейы алы æвзæгтæм дæр. Уый тыххæй журналисттимæ фембæлды радзырдта информацион технологиты æмæ бастдзинады управленийы сæргълæууæг Сæлбиты Алан. Йæ ныхæстæм гæсгæ, сæрмагондæй баныхас кодтой компани «Яндекс»-имæ. Иумæйагæй зонындзинæдты базæйы ис 1 милуан ныхас æмæ дзырдбасты. Ныридæгæн уал райдыдта кусын хъæппæрисджынты къорд. Ныридæгæн ратæлмац кодтой мин æмæ `рдæг иуæджы. Стыр æргом здахынц нысаниуæджы рæстдзинадмæ.
Ацы азы кæронмæ ма фæнд кæнынц «Яндекс-Навигатор» ратæлмац кæнын дæр ирон æвзагмæ. Сдзурдзæн иронау куыд сылгоймаджы, афтæ нæлгоймаджы хъæлæстæй.
Сывæллæттæн ирон æвзагыл анимацион ахуырадон проект «Frank animation» ацы аз акæндзæн ног къахдзæфтæ. 2019 азы рауагътой мультипликацион кинонывы 10 серийы, ныр ма сыл хъуамæ бафта уыйбæрц.
Цæгат Ирыстоны конд интеллектуалон хъæлæсон æххуысгæнæг «Зæлинæ» та бахауд Уæрæсейы хуыздæрты хыгъдмæ. Сарæзтой йæ колл-центры иумæйаг номыр 122-йы бындурыл. Хæдбарæй чи кусы, уыцы интеллектуалон æххуысгæнæг дзуапп ратдзæн коронавирусимæ баст 1 300 фарстæн. Йæ фæрцы хи ныффыссæн ис дохтырмæ, кæнæ та тагъд æххуысы къаретмæ бадзурæн. Нырма уал кусы уырыссаг æвзагыл, фæлæ йæ иронау дзурынмæ дæр бирæ нал хъæуы.
